भारतसँग जोडिएका सीमा ७२ घन्टा बन्द हुने
काठमाडौं: पहिलो चरणमा स्थानीय तहको निर्वाचन हुने भारतसँग सिमाना जोडिएका प्रदेशको सीमा ७२ घन्टा बन्द हुने भएको छ । गृह मन्त्रालयले निर्वाचन हुने जिल्लाको सीमा मात्र सिल गर्ने निर्णय गरेको हो ।पहिलो चरणमा तराईका चितवन र नवलपरासीका केही भागमा निर्वाचन हुँदैछ ।
गृह मन्त्रालयका प्रवक्ता बालकृष्ण पन्थीले सुरक्षा व्यवस्थापनमा ध्यान दिँदै ती क्षेत्रमा सीमा बन्द गर्न लागिएको जानकारी दिनुभयो । ‘पहिलो चरणमा तराईका अधिकांश भागमा निर्वाचन नहुने भएकाले निर्वाचन हुने क्षेत्रका सीमा मात्र बन्द गर्न लागिएको हो । अन्य सीमा क्षेत्रमा प्रहरीको गस्ती र चेक प्वाइन्टले काम गर्नेछन्’, पन्थीले भन्नुभयो ।
सुरक्षा जोखिमसँगै मानिसको आवतजावतबाट हुने अवरोध रोक्न निर्वाचनका समयमा सीमा बन्द गर्ने गरिन्छ । यसअघिका निर्वाचनमा प्रायः ४८ घन्टा सीमा बन्द गरिन्थ्यो । मतदान सकिएपछि सीमा खुल्ने मन्त्रालयले जनाएको छ । खुला सीमाका कारण भारतसँग सिमाना जोडिएका क्षेत्रमा सीमा बन्द हुने गरेको छ । तराईका अधिकांश क्षेत्रमा भने जेठ ३१ गते स्थानीय तहको निर्वाचन हुनेछ ।
निर्वाचन सुरक्षाका लागि ७५ हजार म्यादी प्रहरी नियुक्त गरिएको छ । प्रहरी, सेना, सशस्त्र प्रहरी (एपीएफ) र राष्ट्रिय अनुसन्धान विभागका सुरक्षा अधिकारी निर्वाचन सुरक्षामा खटिनेछन् । स्थानीय तहको निर्वाचन दुई चरणमा हुने भएपछि सुरक्षा निकायलाई सुरक्षा व्यवस्थापन गर्न सजिलो भएको छ । प्रहरी प्रधान कार्यलयले पहिलो चरणको सुरक्षा व्यवस्थापनका लागि पाँच हजार थप प्रहरी परिचालन गरेको छ ।