विद्युत् चोर्नेसँग दुई अर्ब रुपैयाँ असुल
भैरहवा: नेपाल विद्युत् प्राधिकरण वितरण केन्द्र भैरहवाले विद्युत् चोरी गर्ने एक हजार पाँच सय जनालाई जरिबाना गरी दुई अर्ब रुपैयाँभन्दा बढी रकम संकलन गरेको छ । रूपन्देही जिल्लामा मर्चवार, लुम्बिनी, अमुवा, साडी, सूर्यपुरा, धकधई क्षेत्रमा सबैभन्दा बढी विद्युत् चोरी भइरहेको छ ।
चोरी गर्ने त्यसक्षेत्रका ग्राहकलाई थुनामा राखी कारबाही गरिएको केन्द्र प्रमुख मुनिन्द्र ठाकुरले जानकारी दिए । यसक्षेत्रमा गतवर्षभन्दा चारगुना बढी अर्थात् एक हजार पाँच सय ३७ जना ग्राहक विभिन्न कारबाहीमा परेका छन् ।
लाइनमा हुकिङ गरी सिधैं चोरी गर्ने तीन सय ३१ जनालाई पक्राउ गरी प्रहरी चौकीमा थुनेर दण्डजरिबाना गरिएको उपप्रबन्धक ठाकुरले जानकारी दिनुभयो । हुकिङ बाहेक मिटर बक्सबाट चोरी गर्ने अन्य ५७ जना ग्राहक पनि कारबाहीमा परेका छन् । गतवर्ष चार सयजना मात्रै कारबाहीमा परेका थिए।
उद्योग व्यवसाय सञ्चालन गर्नेभन्दा घरयसी बत्ती बाल्ने सर्वसाधारण बढी कारबाहीमा परेका छन् । बर्सेनि जनघनत्व बढे पनि सहज रूपमा विद्युत् आपूर्ति नहुँदा चोरीका घटना वृद्धि भएका हुन् । यसक्षेत्रमा अझै एक हजार दुई सय ४३ ग्राहक कालो सूचीमा परेका छन् । उनीहरूको लाइन कटौती गर्ने र आवश्यक कारबाहीसहित दुई करोड ५२ लाखभन्दा बढी रकम असुली गर्न बाँकी रहेको प्राधिकरणका कर्मचारीले बताए । प्राधिकरणले मिटर बक्सको अभाव देखाउने र सहज रूपमा विद्युत् लाइन जडान नगरिदिँदा बत्ती बाल्न बाध्य भएर चोरी गर्नुपरेको एक उपभोक्ताले गुनासो गरे ।
यसैबीच केन्द्रले समयमै विद्युत महशुल नबुझाउने एक हजार १६ जनाको लाइन कटौती गरेको छ । यसैगरी केन्द्रले विभिन्न कारणले काटिएका आठ सय ७५ लाइन केन्द्रले विद्युत् आपूर्तिबाट दिनहुँ ७६ लाख ८७ हजार रकम संकलन गर्दछ । अर्कोतर्फ केन्द्रले सडक बत्तीबापत १८ करोड ४१ लाखबढी रकम असुल गर्न बाँकी छ ।
नेपाल विद्युत् प्राधिकरण भैरहवा वितरण केन्द्रले चैत मसान्तसम्म नौमहिनामा दुई अर्ब ७६ करोड ५० लाख तीन हजार ६ सय ८८ रुपैयाँ रकम संकलन गरेको छ । गतवर्ष केन्द्रले एक अर्ब ७७ करोड ६१ लाख रुपैया संकलन गरेको थियो । सरकारले उज्यालो नेपाल अभियानको नारा दिए पनि यसक्षेत्रका सबै घरले बत्ती बाल्न पाएका छैनन् । करिब १० लाख जनसंख्या रहेको रूपन्देहीमा सात लाख नागरिक मात्रै विद्युत् सेवाको पहुँचमा छन । केन्द्रमा विद्युत् मिटर बक्स अभाव छ ।
यसैगरी विद्युतीकरण अन्तर्गत पोल गाडिए पनि लाइन विस्तार नहुँदा र अर्कोतर्फ सुकुम्वासी एवं गाउँ वल्कमा वसोवास गर्ने धेरैजसोको जग्गाधनी पुर्जा नहुँदा विद्युत् मिटर पाउनबाट पनि वञ्चित भएका छन् । अझै पनि यहाँ सजिलै मिटर बक्स पाइएको छैन । मिटर बक्स लिन छ महिना कुर्नुपर्ने अवस्था छ । भैरहवामा निवेदन दिएका १२ हजार ग्राहक लाइनमा छन् । यसवर्ष दर्ता ६ हजारलाई मिटर बक्स बाँडिने र अन्य ६ हजारले अर्कोसाल पाउने उपप्रबन्धक ठाकुरले बताउनुभयो ।
भैरहवा वितरण केन्द्रले रूपन्देहीको सिद्धार्थनगर, लुम्बिनी, तिलोतमा नगरपालिका र ६ वटा गाउँपालिका क्षेत्रभित्र विद्युत् आपूर्ति गरेकोे छ । यसबाट भैरहवा क्षेत्रका ४२ हजार २९, नयाँ मिलमा १८ हजार पाँच सय ९४, अमुवामा करिब १७ हजार र लुम्बिनी सांस्कृतिक नगरपालिका क्षेत्रमा १६ हजार चार सय २४ ग्राहकसहित यसक्षेत्रका औद्योगिक, घरवस्ती एवं पसल बजारका ९४ हजार ग्राहकले मात्रै विद्युत् प्रयोग गर्न पाएका छन् ।
प्रतिक्रिया दिनुहोस !
