नेपालद्वारा चीनको ‘वान बेल्ट वान रोड
काठमाडाैं : नेपालले चीनको ‘वान बेल्ट वान रोड' अवधारणामा शुक्रबार हस्ताक्षर गरेको छ । शुक्रबार बिहान परराष्ट्र मन्त्रालयमा आयोजित एक कार्यक्रममा परराष्ट्रमन्त्री डा.प्रकाश शरण महतको उपस्थितिमा नेपालका तर्फबाट परराष्ट्र सचिव शङ्करदाश बैरागी र चीनका तर्फबाट नेपालका लागि चिनियाँ राजदूत यु होङ्ले सो अवधारणाको समझदारीपत्रमा हस्ताक्षर गर्नुभयो ।
उक्त समझदारीपत्रमा हस्ताक्षरपछि मन्त्री डा.महतले यस नयाँ समझदारी दुई देशको सम्वन्धमा महत्वपूर्ण पाइला हो भन्नुभयो । उहाँले भन्नुभयो-‘यो सम्झौताले नेपाल र चीनबीच सडक सञ्जालले जोड्ने र यसका माध्यमबाट नेपालमा चिनियाँ लगानी आई नेपालको आर्थिक विकासमा महत्वपूर्ण टेवा पुग्ने अपेक्षा मैले गरेको छु । उपप्रधानमन्त्री एवम् अर्थमन्त्री कृष्णबहादुर महराको समेत उपस्थिति रहेको सो समारोहलाई सम्बोधन गर्दै मन्त्री डा.महतले नेपालका लागि यो सम्झौता महत्वपूर्ण रहेको र यसपछि नेपालमा सडक सञ्जाल, रेलमार्गको निर्माण, नेपालमा चिनियाँ लगानीजस्ता विषयमा नेपाललाई फाइदा पुग्ने अपेक्षा गरिएको बताउनुभयो ।
मन्त्री डा.महतले भन्नुभयो- नेपाल भूपरिवेष्ठित देश हो र अझै पनि अल्पविकसीत अवस्थामा नै छ, यसलाई ध्यानमा राखेर चीनजस्तो महत्वपूर्ण छिमेकीबाट नेपालमा लगानी हुनेछ र नेपालको आर्थिक विकासमा महत्वपूर्ण टेवा पुग्नेछ । यो समझदारीपत्रमा हस्ताक्षरसँगै नेपालमा विदेशी लगानी र व्यापार प्रवर्धनका क्षेत्रमा नयाँ अध्यायको थालनी समेत भएको हामीले ठानेका छौँ- मन्त्री डा.महतले भन्नुभयो ।
युरोप र अफ्रिका समेतमा विस्तारित हुने यस चिनियाँ आयोजनाबाट नेपाल पनि लाभान्वित हुने हुदा यस आयोजनाको समझदारीपत्रमा भएको हस्ताक्षरले नेपालको आर्थिक विकासमा पनि नयाँ आयाम थपिएको रुपमा आफूले लिएको पनि उहाँले बताउनुभयो । नेपाललाई बढीभन्दा बढी लगानीको खाँचो छ, यसै नयाँ आयोजनामार्फत नेपालमा चिनियाँ लगानी होस् भन्ने हामी चाहन्छौं- उहाँले भन्नुभयो । पछिल्लो समयमा नेपालमा हामीलाई धेरै ठूलो बैदेशिक लगानीको आवश्यकता रहेको भन्दै उहाँले दुई देशबीच भएको समझदारीबाट नेपालले लाभ उठाउने विश्वास व्यक्त गर्नुभयो ।
मन्त्री डा.महतले यस समझदारी पत्रमा हस्ताक्षर हुने समयसम्म आइपुग्नाका लागि दुवै देशका विभिन्न तहमा कैयौं पटकसम्म छलफल र अन्तरक्रियाहरु भएका स्मरण गर्दै यसका लागि सहयोग गर्ने चिनियाँ र नेपाली दुवै पक्षलाई विशेष धन्यवाद ज्ञापन गर्नुभयो । सो कार्यक्रममा परराष्ट्र सचिव बैरागीले नेपालले पनि चीनको यो महत्वपूर्ण आयोजनाबाट लाभान्वित हुने भन्दै यसलाई नेपालको विकास प्रयासको एक महत्वपूर्ण उपलब्धिका रुपमा लिनुपर्ने बताउनुभयो ।
नेपालका लागि चिनियाँ राजदूत यु होङले यस समझदारी पत्रको तयारी र हस्ताक्षरसम्ममा नेपालको परराष्ट्र मन्त्रालयले गरेको महत्वपूर्ण प्रयासका लागि धन्यवाद ज्ञापन गर्दै यस आयोजनाबाट चीन नेपाल सहयोग र विशेषगरी दक्षिणी एसियाली क्षेत्रकै आर्थिक विकासमा सहयोग पुग्ने धारणा राख्नुभयो ।
भिडियाे हेर्नुहाेस्
प्रतिक्रिया दिनुहोस !
