भारतद्वारा चीनमा जारी बेल्ट एण्ड रोड शिखर सम्मेलन बहिष्कार

काठमाडौ : भारतले चीनमा आयोजना भइरहेको बेल्ट एण्ड रोड अन्तर्राष्ट्रिय सम्मेलन बहिष्कार गरेको छ । आइतबार बिहान शुरु बेल्ट एण्ड रोड सम्मेलनमा दिल्लीबाट कोही पनि राजनीतिक तथा सरकारी पदाधिकारी सहभागी छैनन् ।

महाशक्ति अमेरिका, रुस,बेलायत,जर्मनी लगायत विश्वका प्रभावशाली मुलुकले आफ्ना सरकारी प्रतिनिधि सम्मेलनमा पठाएपनि भारतले भने यस सम्मेलन बहिष्कार गरेको हो । दक्षिण एसियाबाट उक्त बेल्ट एन्ड रोड सम्मेलन बहिष्कार गर्ने मुलुक भारत र भुटान हुन्। भुटानसंग चीनको कूटनीतिक सम्बन्ध छैन । सम्मेलनमा बंगलादेश, पाकिस्तान, नेपाल तथा श्रीलंकाबाट उच्चस्तरीय प्रतिनिधिमण्डल सहभागि भइरहेका छन् ।

सम्मेलनमा बेइजिङ्स्थित भारतीयदूतावासका प्रतिनिधिलाई मात्र सहभागिताका लागि भारत सरकारले खटाएको छ। यससंगै एसियाका दुई उदीयमान अर्थतन्त्र भारत र चीनबीच एक बर्षयता जारी तनाव थप चुलिएको र तिक्तता बढेको अन्तर्राष्ट्रिय संचारमाध्यमहरुले जनाएका छन् ।

बेल्ट एन्ड रोड अवधारणाको प्रमुख अंग रहेको पाकिस्तान—चीन आर्थिक करिडोर निर्माणप्रति आफ्नो असहमति रहेको भारतले बताएको छ । पाकिस्तान नियन्त्रित गिल्गिट बाल्टिस्थान (कस्मिरको एक भाग) हुंदै उक्त आर्थिक करिडोर निर्माण गरिएको भन्दै भारतले आपत्ति जनाएको हो । भारतको सार्वभौमसत्ता तथा अखण्डता चीनले हनन गरेको भारतको दाबी छ ।

चीनले भने कस्मिर समस्या वार्ताबाट समाधान हुनुपर्ने बताउंदै भारतको सार्वभौमिकता र अखण्डताप्रति आफू सचेत रहेको जनाएको छ । चीनले उक्त सम्मेलनको उद्द्घाटनसहित ६ वटा सत्रमा सहभागि हुन भारतलाई निमन्त्रणा गरेको थियो । भारत र पाकिस्तानले जम्मु र कस्मिरलाई आफ्नो भू—भाग दाबी गर्दै आएका छन् । जसका कारण यी दुई दक्षिण एसियाली मुलुकबीच चारपटक सीमा युद्द भइसकेको छ ।
भारतीय बिदेश मन्त्रालयले शनिबार अबेर राती जारी गरेको वक्तव्यमा बेल्ट एन्ड रोड अवधारणा समावेसीमुलक नरहेको, भारतसंग बिनापरामर्श शुरु भएको लगायतका आरोप लगाइएको छ ।