काठमाडौं : नेपालको छात्र टोली आईटीएफ एसियाली यू-१२ टिम च्याम्पियनसिपको दक्षिण एसियाली छनोटमा फाइनलमा प्रवेश गरेको छ ।सातदोबाटोस्थित टेनिस कोर्टमा बिहीबार भएको सेमिफाइनलमा नेपालले बलियो मानिएको प्रतिद्वन्द्वी भारतलाई २-१ ले पराजित गर्यो । फाइनलमा स्थान सुरक्षित गरेसँगै नेपाल काजाकिस्तानमा नोभेम्बरमा हुने आईटीएफ एसियाली यू-१२ टिम च्याम्पियनसिपमा स्थान पक्का गर्न सफल भएको छ । फाइनल पुग्ने दुई राष्ट्र काजाकिस्तानमा हुने च्याम्पियनसिपलाई छनोट हुने प्रावधानअनुरूप छात्रमा बंगलादेश पनि सफल भयो । अर्को सेमिफाइनलमा बंगलादेशले भुटानलाई ३-० ले हराउँदै नेपालसँगको फाइनल भेट पक्का गर्यो ।
पहिलो एकलमा आरभसम्राट हाडाले भारतका बालाजी निथिस लथा नल्लुसामीलाई ६-२, ६-३ को सोझो सेटमा पाखा लगाउँदै नेपाललाई विजयी सुरुआत दिलाए । अर्को एकलमा नेपालका आर्यन गिरी भारतका आयुष्मान अर्जेरियासँग ६-१, ६-० को सोझो सेटमा पराजित भएपछि खेल १-१ को बराबरी स्थितिमा पुगेको थियो । निर्णायक डबल्समा भने आरभ र आर्यनको जोडीले भारतका आयुष्मान र कृषाङ रघुवंशीलाई ७-५ र ६-४ ले निराश पार्दै काजाकिस्तानको टिकट पक्का गरेका थिए ।
'सोचेभन्दा राम्रो नतिजा आएकोमा खुसी छु । भारत बलियो प्रतिद्वन्द्वी हो । तैपनि उसलाई (भारत) कडा टक्कर दिनुपर्छ भन्नेमा थियौं । घरेलु कोर्ट र खेलाडीले राम्रो प्रदर्शन गरेकाले जित सम्भव भयो', नेपाली ब्वाइज टिमका प्रशिक्षक कृष्णराज घलेले भने, 'अब फाइनलमा हाम्रो प्रतिद्वन्द्वी बंगलादेश हो । बंगलादेश शारीरिक रूपमा बलियो भए पनि प्राविधिक पक्षमा हाम्रा खेलाडी राम्रा छन् । फाइनलमा पनि केटाहरूले राम्रो प्रदर्शन गर्नेमा विश्वस्त छु ।'
छात्रातर्फ श्रीलंका र भारत फाइनलमा पुग्दै काजाकिस्तानको यात्रा पक्का गरे । श्रीलंकाले नेपाल तथा भारतले बंगलादेशलाई समान ३-० ले पाखा लगाए । नेपालबाट एकलमा सर्भानी श्रेष्ठ र ईशा श्री शाह तथा डबल्समा ईशा श्री र सुभांगीलक्ष्मी शाहले प्रतिस्पर्धा गरेका थिए । तीनै स्पर्धामा नेपाली खेलाडी सोझो सेटमा पराजित भए।
प्रतिक्रिया दिनुहोस !
