गितारका गुरु
व्यावसायिक रूपमा संगीतकर्ममा लागेको दुई दशकभन्दा बढी भयो । यसबीचमा प्राप्त उपलब्धि, सन्तुष्टि र पहिचानबाट उनी खुसी छन् । नेपाली सांगीतिक क्षेत्रमा बहुप्रतिभाशाली मानिने रोशन बान्तवा गितार एवं किबोर्ड वादन, संगीत सिर्जना र संगीत संयोजन विधामा खास दखल राख्छन् । २०५४ सालमा उनले लेखेको पुस्तक 'गितार सोलुसन' गितारप्रेमीका लागि प्रिय पुस्तक साबित भयो ।
पहिलो पुस्तकमा पाठकको मायाबाट उत्साहित उनले २०५६ सालमा 'सजिलो किबोर्ड' नामक दोस्रो पुस्तक प्रकाशन गरे । संगीतका विद्यार्थीले बुझ्ने गरी लेख्नु रोशनको विशेषता हो । उनले लेखेका अन्य पुस्तकमा 'गितार बुक्स एन्ड कर्ड ग्यालरी' (२०६०), 'किबोर्ड गाइड' (२०६०), 'सजिलो गितार' (२०६३) र हालै प्रकाशित 'की बोर्ड गाइड' (२०७४) हुन् । राजधानी र मोफसलका धेरै म्युजिक इन्स्टिच्युटले उनका पुस्तकलाई आधार मानेर पढाउने गरेका छन् ।
गितार र किबोर्डसम्बन्धी सातवटा पुस्तक लेखिसकेका बान्तवाले हङकङ र दार्जिलिङबाट यससम्बन्धी ज्ञान हासिल गरेका छन् । दार्जिलिङमा कहलिएको 'ट्रिनिटी म्युजिक स्कुल'मा उनले दुई वर्ष गितार सिकेका हुन् । यो स्कुल विश्वमै चर्चित मानिने बेलायतको ट्रिनिटी म्युजिक स्कुलको शाखा हो ।
'कुनै बाजामा सुरमात्रै हुन्छ भने कुनैमा तालमात्रै । तर, गितारमा सुर र ताल दुवै हुने भएकाले विश्वसंगीतमै गितार सबभन्दा बढी प्रयोग हुने लोकप्रिय वाद्ययन्त्र हो ।
पाँचथरको कुरुम्बामा २०३१ सालमा जन्मिएका बान्तवा २०४८ सालदेखि राजधानीमा रही संगीतकर्ममा क्रियाशील छन् । पछिल्लो समय नेपाली संगीतमा गितारको प्रयोग र क्रेज बढेकोमा उनी खुसी छन् । 'विश्व संगीतमै गितार सबभन्दा बढी प्रयोग हुने वाद्ययन्त्र हो', रोशन भन्छन्, 'कुनै बाजामा सुरमात्रै त कुनैमा तालमात्रै हुन्छ तर गितारमा सुर र ताल दुवै हुने भएकाले लोकप्रिय भएको हो ।' बाँसुरी, हार्मोनियम, सितार, भायोलियन, सारंगीजस्ता बाजामा सुरमात्रै हुन्छ भने तबला, मादल, ढोलक, ड्रमसेट लगायतका बाजाले तालमात्रै दिन्छ ।
अझ गितार बोक्न सजिलो हुनुका साथै युवापुस्ताको प्रिय बाजा साबित भएको छ । कुनै समय नेपाली संगीतमा रक, पप, आधुनिक गीतमा मात्रै गितार बजाउने गरिए पनि अहिले लोक, दोहोरी, गजलदेखि भजनमा समेत गितार बजाउन थालिएको छ ।
राजधानीका युनाइटेड एकेडेमी, भीएस निकेतन, फ्युचर स्टार, ग्रामरलगायतका विभिन्न स्कुलमा संगीत शिक्षकका रूपमा समेत काम गरेका उनले पछिल्लो समय संगीत संयोजनलाई प्राथमिकता दिएका छन् । यस क्षेत्रमा लाग्न उनलाई त्यति सहज भने थिएन । एसएलसीपछि घरपरिवारले उच्च शिक्षाका लागि धनकुटा पठाउन खोजेका थिए । तर, संगीतमा केही गर्ने सपना लिएर उनी सात भञ्ज्याङ नाघेर राजधानी आए ।
अहिले संगीतकर्मबाट उनले प्राप्त गरेको उपलब्धिबाट परिवार पनि सन्तुष्ट छन् । 'अहिले नेपाली संगीत क्षेत्रमा पनि अवसर छ तर प्रतिस्पर्धा गर्न सक्नुपर्छ', रोशन भन्छन्, 'परिवारको चाहनाविपरीत यो क्षेत्रमा लागे पनि अहिले सबै खुसी र सन्तुष्ट हुनुहुन्छ । काम, दाम सबै पाएको छु । फुर्सदमा बस्नु परेको छैन ।
प्रतिक्रिया दिनुहोस !
