काठमाडौं : प्रधानमन्त्री पुष्पकमल दाहालले राजीनामा दिने तयारी गरिरहँदा परराष्ट्रमन्त्री प्रकाशशरण महतले विदेशस्थित विभिन्न नेपाली नियोगका कर्मचारीको सरुवा गर्ने तयारी गर्नुभएको छ ।
८ उपसचिव, ५ शाखा अधिकृत र ७ जना सुब्बा तहका कर्मचारीको सरुवा आइतबार टुंगो लगाउने तयारी गरिएको जानकारी मन्त्रालय स्रोतले दिएको छ । सरकारको बहिर्गमनअघि मन्त्री महतले गर्न लाग्नुभएको सरुवा परराष्ट्रकै केही कर्मचारीका कारण विवादास्पद पनि बनेको छ ।
परराष्ट्र कर्मचारी सरुवा निर्देशिकाअनुसार गत चैतमा नै विदेशस्थित नियोगका कर्मचारीको सरुवा गर्नुपर्ने भए पनि अनावश्यक विवाद झिकेर रोकेर थाती राखेको आरोप कर्मचारी लगाउँछन् । स्रोतका अनुसार मन्त्री महतको निर्देशनमा हालै मात्र निर्देशिकामा दोस्रोपटक हेरफेर गरिएको छ ।
विगतमा ६÷६ महिनामा कर्मचारी सरुवा हुने गरेको भए पनि केही कर्मचारी ‘एड्जस्ट गर्नुपर्ने' भन्दै आगामी २०७५ वैशाखसम्ममा पद रिक्त हुने नियोगमा समेत सरुवाको तयारी भइरहेको छ । ‘मन्त्री निकटलाई आकर्षक नियोगमा सरुवा दिलाउन निर्देशिका हेरफेर गरिएको छ । यसले इमानदार कर्मचारीबीच निराशा र असमझदारी पैदा गरेको छ', परराष्ट्र स्रोतले भन्यो ।
आफ्नै सचिवालयमा कार्यरत उपसचिव प्रकाश अधिकारीलाई क्यानडास्थित नेपाली दूतावासमा सरुवा गर्र्ने पक्षमा मन्त्री महत अडिग हुनुहुन्छ । मन्त्रालयका कर्मचारीले अधिकारीलाई आकर्षक नियोगमै पठाउनु निर्देशिका र स्थापित मान्यताविपरीत हुने बताउँदै आएका छन् । अधिकारीले यसअघि आकर्षक मानिएको क वर्गका न्युयोर्क र डेनमार्कस्थित नियोगमा काम गरिसक्नुभएको छ ।
क्यानाडास्थित नियोगमा सरुवा पाउनुपर्ने अडानमा उपसचिव दुरपदा सापकोटा पनि हुनुहुन्छ । तर सापकोटालाई आउँदो वैशाखमा रिक्त हुने काठमाडौंस्थित सार्क सचिवालयको निर्देशकमा पठाउने तयारी भइरहेको परराष्ट्र स्रोतको भनाइ छ । सरुवा हुने उपसचिवको सूचीमा प्रकाश अधिकारी, दुरपदा सापकोटा, दधिराम भण्डारी, सागर फुयाँल, सुधीर भट्टराई, पारस पण्डित, कुमार राई र रामसिंह थापा हुनुहुन्छ ।
बेइजिङ, श्रीलंकाजस्ता आकर्षक नमानिने ‘ग' वर्गका दूतावासबाट करिब दुई वर्षअघि मन्त्रालय फर्किनुभएका उपसचिव राई र थापालाई सरुवासूचीमा राखिएको छैन । ‘तर एक वर्षअघि मात्रै फर्किएकालाई भने सरुवाको तयारी गरिएको छ । यो अन्यायपूर्ण छ', एक सहसचिवले भने ।
साउदी अरेबियास्थित दूतावासमा कार्यरत सुब्बा अरेन्द्र महर्जनलाई फ्रान्समा सरुवा गर्ने तयारी भएको छ । महर्जनलाई हालै कारबाहीको सिफारिस भएको स्रोत बताउँछ । नियमित रूपमा हुनुपर्ने प्रक्रियाअनुसार तथा न्यायपूर्ण सरुवा हुनुपर्नेमा मन्त्रीको तहबाट भएको अनावश्यक हस्तक्षेपले कर्मचारीबीच असन्तुष्टि चुलिएको कर्मचारी बताउँछन् । सहसचिव स्तरमा सरुवा समिति बनाइए पनि मन्त्री तहबाट भएको हस्तक्षेपले समस्या उत्पन्न भएको अधिकारी बताउँछन् ।
‘मन्त्रीले परराष्ट्रको संस्थागत हित, विदेश नीति सञ्चालनका लागि ठोस पहल र सुदृढीकरणमा ध्यान दिनुपर्नेमा अधिकृत, उपसचिव र सुब्बा तहका कर्मचारीको सरुवामा ध्यान केन्द्रित गर्नु अत्यन्त दुःखद् छ', एक सहसचिवले अन्नपूर्णसँग भने ।
प्रतिक्रिया दिनुहोस !
