आईपीइएल-२०१७ को उपाधि मुम्बई इन्डियनलाई
हैदराबाद : इन्डियन प्रिमियर लिग (आईपीएल) टीट्वेन्टी क्रिकेट प्रतियोगिताको दशौं संस्करणको उपाधि मुम्बई इन्डियन्सले जितेको छ । मुम्बईले आइतबार राति खेलिएको फाइनलमा राइजिङ पुने सुपरजाइन्टमाथि एक रनको रोमाञ्चक जित हासिल गर्यो । मुम्बईले आईपीएलको उपाधि जितेको यो तेस्रोपटक हो । टस जिती पहिले ब्याटिङको निर्णय लिएको मुम्बईले निर्धारित ओभरमा आठ विकेट गुमाएर एक सय २९ रन बनायो । जवाफी ब्याटिङमा ओर्लिएको पुनेले भने निर्धारित ओभरमा ६ विकेट गुमाएर एक सय २८ रनमात्र बनाउन सक्यो ।
अनुभवी बलर मिचेल जोन्सनले अन्तिम ओभरमा महत्वपूर्ण दुई विकेट लिएपछि मुम्बईको जित सम्भव भएको थियो । अन्तिम ओभरको दोस्रो बलमा जोन्सनले मनोज तिवारी (सात रन) लाई पोलार्डद्वारा लङ अनमा क्याच गराए । त्यसलगत्तै अर्को बलमा उनले क्रिजमा जमिसकेका पुनेका कप्तान स्टिभन स्मिथलाई पनि रायडुद्वारा क्याच गराए । त्यतिबेला स्मिथ ५१ रनमा खेल्दै थिए । उनले ५० बलको सामना गरी दुई छक्का र दुई चौका प्रहार गरे ।
पुनेलाई अन्तिम बलमा जितका लागि चार रन आवश्यक थियो । जोन्सनको अन्तिम बललाई पुनेका ब्याट्सम्यान ड्यानियल क्रिस्टियनले डिप स्क्वायर लेगमा खेलेका थिए । त्यसपछि पुनेले दुई रन लियो तर तेस्रो रन लिन दौडिएका क्रिस्टियन रनआउट हुन पुगेपछि नतिजा मुम्बईको पोल्टामा गएको थियो । पुनेका ओपनर ब्याट्सम्यान अजिन्क्या राहानेको विकेट पनि जोन्सनले नै लिएका थिए । राहानेलाई ४४ रनको व्यक्तिगत स्कोरमा जोन्सनले पोलार्डद्वारा क्याच गराएका थिए । राहानेले ३८ बलको सामना गरी पाँच चौका प्रहार गरे । महेन्द्रसिंह धोनी १० रनमा आउट भए भने पुनेका अन्य ब्याट्सम्यान क्रिजमा जम्न सकेनन् । मुम्बईका बलर जसप्रीत बुमराहले पनि दुई विकेट लिए ।
यसअघि पहिले ब्याटिङ गरेको मुम्बईका लागि क्रुणाल पाण्डेयले सर्वाधिक ४७ रन बनाएका थिए । सुरुमै दुबै ओपनरलाई गुमाएपछि दबावमा आएको मुम्बईका लागि क्रुणालले जिम्मेवारीपूर्ण पालि खेल्दै ३८ बलमा दुई छक्का र तीन चौका प्रहार गरे । कप्तान रोहित शर्माले २२ बलको सामना गरी चार चौकाको मद्दतले २४ रन बनाएका थिए । ओपनर ब्याट्सम्यान लेन्डल सिमोन्स तीन रनमै पेभेलियन फर्किए भने पार्थिव पटेल पनि चार रनभन्दा अगाडि बढ्न सकेनन् ।
मुम्बईको खातामा अम्बाटी रायडुले १२ रन थपे । काइरन पोलार्ड सात रनमै पेभेलियन फर्किए भने हार्दिक पाण्डेयले पनि १० रनमात्र जोड्न सके । कर्ण शर्मा एक रनकै व्यक्तिगत स्कोरमा रनआउट भए भने मिचेल जोन्सनले अविजित १३ रन बनाए । सुरुदेखि नै मुम्बईलाई दबावमा राखेका पुनेका बलर जयदेव उनादकट, एड्म जाम्पा र ड्यानियल क्रिस्टियनले दुई÷दुई विकेट हात पारे ।
सन् २००८ देखि सुरु भएको आईपीएल क्रिकेटमा मुम्बईले यसअघि दुईपटक उपाधि जितेको थियो । मुम्बईले सन् २०१३ र सन् २०१५ को उपाधि हात पारेको थियो । नवौं संस्करणको उपाधि भने सनराइजर्स हैदराबादले हात पारेको थियो । पहिलो संस्करणमा राजस्थान रोयल्स, दोस्रोमा डेक्कन चार्जर्स, तेस्रो र चौथोमा चेन्नई सुपर किंग्स, पाँचौंमा कोलकाता नाइट राइडर्स, छैटौंमा मुम्बई, सातौंमा कोलकाता तथा आठौं संस्करणमा मुम्बई च्याम्पियन बनेका थिए ।
यसपटक लिग चरणको खेलपछि मुम्बई पहिलो, पुने दोस्रो, हैदराबाद तेस्रो र कोलकाता चौथो हुँदै प्लेअफ चरणमा पुगेका थिए । प्रतियोगिताको पहिलो क्वालिफायरमा पुनेले मुम्बईलाई २० रनले हराउँदै फाइनलमा स्थान बनाएको थियो । तेस्रो र चौथो स्थानको टोलीबीच भएको एलिमिनेटर खेलमा कोलकाताले हैदराबादलाई डकवर्थ एन्ड लेविस नियमका आधारमा सात विकेटले पराजित गरेको थियो । यसैगरी दोस्रो क्वालिफायर खेलमा कोलकातालाई ६ विकेटले हराउँदै मुम्बईले पुनेसँगको उपाधि भिडन्त पक्का गरेको थियो ।