उत्तर कोरियाप्रति दक्षिण लचिलो बन्ने

सोल : दक्षिण कोरियाको एकीकरण मन्त्रालयले उत्तर कोरियासँग नागरिक आदानप्रदान गरिनेलगायतका प्रमुख अन्तर कोरियाली मामिलामा लचिलो नीति अवलम्बन गरिने बताएको छ । मन्त्रालयले उत्तर कोरियाली नेताहरूसँग वार्ता गर्ने मनस्थितिमा रहेको समेत स्पष्ट पारेको छ ।प्रेस भेटघाट कार्यक्रममा एकीकरण मन्त्रालयका प्रवक्ता लि डुक हाएङले उत्तर कोरियासँग नागरिक आदानप्रदान, सीमा सुरक्षालगायतका मुद्दाहरूमा निकै लचकतापूर्ण पुनरावलोकन गरिने बताएका छन् ।

यद्यपि उत्तर कोरियामाथि अन्तर्राष्ट्रिय समुदायले लगाएको प्रतिबन्धको मर्मविपरीत नहुने गरी यस्ता कार्य अगाडि बढाइने उनले जानकारी दिए । नवनिर्वाचित वर्तमान राष्ट्रपति मुन जे इनले एक नवीन आयामको (सन साइन पोलिसी) नीति ल्याई उत्तर कोरियासँग सम्बन्ध सुधार गर्न खोजेको खुलासा गरिएको छ । सनसाइन पोलिसीअन्तर्गत दुई कोरियाबीच लगानी र वाणिज्यमैत्री वातावरणसमेत निर्माण गरिने छ । यस प्रकारको अवधारणा भूतपूर्व कोरियाली राष्ट्रपतिहरू रो मु ह्युम र किम हाए जुङले समेत ल्याएका थिए ।

यद्यपि त्यसबेला यो नीतिले मूर्तरूप भने लिन पाएको थिएन । राष्ट्रपति मुनभन्दा अगाडिकी राष्ट्रपति पार्क ग्युन हायले उत्तर कोरियासँग निकट सम्बन्ध राख्ने प्रयास गरेकी थिइनन् । राजनीतिक सम्बन्ध जे जस्तो भए पार्कले उत्तर कोरियालाई मानवीय सहायतालाई निरन्तरता दिइरहेकी थिइन् । दक्षिण कोरियाको राष्ट्रपति पदमा उदारवादी दल डेमोक्र्याटिक पार्टीका प्रमुख नेता मुन जे इन विजयी भएलगत्तै उनले उत्तर कोरियासँगको सम्बन्धमा नरमपन देखाएका छन् । यसबाट दुई कोरियाबीचको तनावपूर्ण सम्बन्धमा सुधार हुने अपेक्षा गरिएको छ । करिब दुई साताअगाडि मुन राष्ट्रपति पदमा निवार्चित भएका थिए ।

वर्तमान राष्ट्रपति दक्षिण कोरियाको गियोजेमा जन्मिए पनि उनको पैतृक थलो भने हालको उत्तर कोरियामा पर्छ । दुई कोरियाको विभाजनपश्चात् उनका पिता मुन योङ-ह्युङ उत्तर कोरियाबाट पलायन भई शरणार्थीको रूपमा दक्षिण कोरिया प्रवेश गरेका थिए । मुनले आफ्ना पितासँगसँगै दक्षिण कोरिया आई शिक्षा आर्जनलगायत चरित्र निर्माण गरेका थिए । आफू राष्ट्रपतिमा निर्वाचित भएलगत्तै मुनले बाल्यकालमा रमाएको भूमिउपर सद्भाव प्रदर्शन गर्ने र स्थिति अनुकूल हुनासाथ अतिशीघ्र प्योङयाङ भ्रमण गर्ने बताएका थिए । राष्ट्रपति भएलगत्तै मुनले उत्तर कोयिासँग छलफल र सार्थक वार्ता गर्ने जानकारी दिएका थिए ।