पाप युद्ध
सामान्यतया 'जेहाद' ले इस्लाम धर्मविरोधीहरू विरुद्धको युद्ध भन्ने बुझिन्छ । तर यता आएर 'जेहाद' ले बढी राजनीतिक स्वरूपसँगै क्रमश: 'धार्मिक' र मानवीय पक्ष अनि धर्मका सबै चरित्रहरू गुमाउँदै गएको छ । मंगलबार बिहान (नेपाली पात्रोअनुसार) बेलायतको म्यानचेस्टरमा आयोजित एउटा सांस्कृतिक भेला (कन्सर्ट) मा एकजना आत्मघातीद्वारा गरिएको विस्फोटमा कमसेकम २२ जनाको ज्यान गएको छ र कयौं घाइते भएका छन् । ज्यान गुमाउनेहरूमा ८ वर्षकी एक बालिकासमेत छन् ।
सांस्कृतिक कार्यक्रमकी प्रस्तोता प्रसिद्ध अमेरिकी गायक आरियाना ग्लान्डको मनोदशा र अवस्था बुझ्न सकिन्छ यो घटनापछि । संगीत मानव सभ्यताबीचको कडी बन्न सक्छ, तर त्यसको प्रस्तुतिलाई कायरतापूर्ण आक्रमणका अवसरका रूपमा प्रयोग गरिनु, धर्मका नाममा हुन सक्ने सबभन्दा ठूलो अपराध हो ।
घटनाको छानबिनको क्रममा बेलायती प्रहरीले सलमान आवेदी नामक व्यक्ति आत्मघाती विस्फोटकर्ता भएको बताएको छ । आवेदी केही दिनअघि मात्र द्वन्द्वरत लिबियाबाट फर्केको र उनको संलग्नता 'इस्लामिक स्टेट' नामक अतिवादी संस्थासँग भएको अड्कलबाजी भइरहेका छन् । तर, जुन संगठनले धर्मका नाममा निहत्था व्यक्तिहरू या अबोध बालबालिकालाई निशाना बनाउँछ त्यसले खाली एउटा सभ्यता, मानवता र मानवीयता अनि हरेक धर्मका ग्रहणयोग्य चरित्रलाई समूल नष्ट गर्ने लक्ष लिएको मानिन्छ । म्यानचेस्टर घटना या आक्रमणलाई त्यस अर्थमा पापको क्रुरतम स्वरूपको पक्षमा गरिएको एउटा जघन्य अपराधका रूपमा लिइनेछ ।
त्यो सांस्कृतिक भेलामा उपस्थित गायक आरियाना या उनका उत्साहित श्रोताहरू सबै संगीत र साहित्यको उत्कृष्टताका उपासक या प्रशंसक थिए । कुनै पनि जघन्य अपराधीले धर्म र मानवीयतालाई आफ्नो प्रमुख निशाना बनाउने हुँदा ती उत्कृष्ट व्यक्तिहरूको भेलालाई त्यस अर्थमा बुझ्नुपर्छ ।
यो आक्रमण अत्यन्त निन्दनीय छ । सम्भवत: मानव सभ्यताको इतिहासमा अन्तिम कलंक हुने छैन । तर यो घटना, त्यसका योजनाकार र कार्यान्वयनकर्ताको नृशंसताबाट सहजै अनुमान गर्न सकिन्छ, त्यस्ता शक्तिहरूले कायरताको पराकाष्ठालाई अंगालेका छन् र त्यो उनीहरूको यात्राको अन्तिम चरण हो । म्यानचेस्टरको घटनामा निर्दोषहरूको सहादतले यो प्रकृतिको आतंकवादको मृत्यु सुनिश्चित गरेको छ । इस्लाम धर्म र त्यसका 'प्रोफेट' का नाममा गरिएको यो पाप र त्यसको सञ्जाललाई अस्वीकार्य घोषणा गर्दै त्यसलाई पराजित गर्ने पहिलो कदम सम्भवत: इस्लाम धर्मका सच्चा अनुयायीले गर्नुपर्ने छ ।
प्रतिक्रिया दिनुहोस !
