यस निर्वाचनमा धेरैजसो पार्टीमा आबद्ध महिला निर्वाचित भएका छैनन् । तर कतिपय ठाउँमा गृहिणीमात्रै पनि निर्वाचित भएकोमा हामी धेरै खुसी छौं । अब उहाँहरूलाई कसरी सक्षम बनाउने भन्नेमा हामी लाग्नु जरुरी छ।
-सरस्वती बस्नेत, केन्द्रीय सदस्य, अखिल नेपाल महिला संघ
महिलालाई अगाडि नबढाई देशको विकास हुन सक्दैन । त्यसैले यो निर्वाचनमार्फत स्थानीय तहमा महिलाको संख्या वृद्धि हुनु भनेको सबै नेपाली महिलाको लागि गर्वको विषय हो । हामी पनि आधा धर्ती ओगट्ने यो देशका नागरिक हौं भन्ने महसुस भएको छ ।
-हरिप्रभा खड्गी, कांग्रेस नेत्री
यो एकदमै सकारात्मक र खुसीको कुरा हो । यस पटकको चुनाव महिलाका लागि उत्साहजनक लागेको छ । तर कतिपय नेताका आफन्त नातेदारहरू बढी आएका छन् कि जस्तो लाग्छ । प्रतिभावान्, गर्न सक्ने महिलालाई अवसर दिनुपर्छ । यो कुरा पार्टी, पार्टीका नेताले बुझ्न जरुरी छ । घर सम्हाल्ने महिलाले समाज पनि सम्हाल्न सक्छ । महिलाहरू बढी अनुशासित र व्यवस्थापनमा दक्खल राख्ने भएकाले राम्रो काम गर्न सक्छन् ।
-हेमा मानन्धर, अध्यक्ष, नेप्लिज फेसन होम
महिलाहरू जनप्रतिनिधिका रूपमा धेरै संख्यामा आउनु सकारात्मक कुरा हो । यसले समाजमा राम्रो प्रभाव छाड्न, सोच परिवर्तन गर्न सक्छ । नेपालमा आधाभन्दा बढी जनसंख्या रहेकाले यो आवश्यक पनि छ । पछिल्लो समय नेपाली समाज अलि उदार र जागरुक भएको देखिन्छ । तर मुख्य कुरा महिला भएकैले अवसर दिनुभन्दा पनि सक्ने र क्षमतावान्लाई अगाडि ल्याउन जरुरी छ ।
-धीरज राई, पपगायक
स्थानीय तहमा महिलाको संख्या बढ्नु भनेको अवसरको साथै चुनौती पनि थपिएको छ । अब महिलाले आफ्नो अध्ययन र क्षमतालाई प्रयोग गरेर दक्षता सावित गराउनुपर्छ । यो सबै नेपाली नारीका लागि खुसीको कुरा हो । महिला पनि सक्षम छन् गर्न सक्छन् भन्ने प्रमाणित गर्ने बेला हो ।
-लक्ष्मी पौडेल, उपप्रमुखः सुनकोसी गाउँपालिका, सिन्धुपाल्चोक
महिला पनि उत्तिकै सक्षम छन् । तर अवसर पाइरहेका छैनन् । चलचित्र क्षेत्रमा जस्तै राजनीतिमा पनि अब महिला सहभागिता बढाउनुपर्छ र यस पटकको स्थानीय तहको चुनाव यस अर्थमा महŒवपूर्ण पनि सावित भएको छ । समाज एवं परिवर्तन गर्न राजनीतिको ठूलो भूमिका हुन्छ तर अन्य क्षेत्रको तुलनामा त्यही क्षेत्रमा समान सहभागिता छैन । विस्तारै बढ्दो छ । यो खुसीको कुरा हो ।
-उत्तम केसी, अभिनेता
स्थानीय तहमा महिला सहभागिता बढ्नुलाई प्रजातान्त्रिक प्रक्रियाको आधार मानेको छु । राष्ट्रपतिदेखि स्थानीय तहसम्म महिला आउनु भनेको ठूलो फड्को हो । हिजोको दिनमा जुन समस्या पुरुषले बुझ्दैनथे त्यो महिलाले नेतृत्व गरेपछि बुझ्ने छन् । चुलो चौकाबाट बाहिर आउनु र जनताको विश्वास पाएर जित्नु महिलाको अवस्थामा आएको परिवर्तनको प्रमाण हो ।
-मन्दिरा दुलाल
यो समग्र नेपाली नारीका लागि गौरवको विषय हो । हुन त यस पटक संविधानले नै अनिवार्य व्यावस्था गरेकाले यो परिणाम आएको हो । अव जननिर्वाचित महिलाले हामी पनि गर्न सक्छौं भनेर प्रमाणित गर्नुपर्छ । स्थानीय तहमा मात्रै होइन राज्य सञ्चालनका हरेक अंगमा महिला सहभागीता बढाउनु पर्छ ।
-लक्ष्मी योङहाङ, मोडेल
प्रतिक्रिया दिनुहोस !
