काठमाडौं: सुदूरपश्चिमाञ्चल र पूर्वाञ्चलले प्रथम प्रधानमन्त्री कप राष्ट्रिय क्रिकेट प्रतियोगिताअन्तर्गत शुक्रबारको खेलमा अंक बाँडेका छन् । वर्षाले खेल पूरा हुन नपाएपछि दुवै टोलीले एकएक अंक बाँडेका हुन् । कीर्तिपुरस्थित टीयू क्रिकेट मैदानमा पूर्वाञ्चलले जवाफी ब्याटिङ गरिरहँदा बारम्बार वर्षा भएपछि खेल स्थगित गरिएको थियो ।
टस जिती पहिले ब्याटिङ गरेको सुदूरले ४५.२ ओभरमा सबै विकेट गुमाउनुअघि एक सय ५३ रनको योगफल खडा गरेको थियो । जवाफी ब्याटिङमा आएको पूर्वाञ्चलले निकै कमजोर सुरुआत गरेको थियो । पूर्वाञ्चलले चार ओभरमा मात्र २२ रन बनाउँदा चार विकेट गुमाइसकेको थियो । त्यसपछि सुरु भएको वर्षाले खेल सुरु हुन दिएन । मध्यम विजयी लक्ष्य प्रस्तुत गर्दै उत्कृष्ट बलिङ गरेको सुदूरपश्चिमाञ्चललाई वर्षाले ठूलो घाटा पुर्याएको छ ।
प्रतियोगितामा दोस्रो खेल खेलेको सुदूरले जितको बलियो आधार तय गरिसकेको अवस्थामा पूर्वाञ्चलसँग अंक बाँड्न बाध्य बनेको हो । प्रतियोगितामा तेस्रो खेल खेलेको पूर्वाञ्चललाई भने वर्षाले राहत पुर्याएको छ । यसअघि विभागीय टोली त्रिभुवन आर्मी र नेपाल पुलिससँग लगातार दुई खेल गुमाइसकेको पूर्वाञ्चलले तेस्रो महत्ववपूर्ण एक अंक बटुलेको छ ।
सुदूरपश्चिमाञ्चलका लागि विजय रानाले सर्वाधिक अर्धशतकीय ५५ रनको योगदान दिएका थिए । विजयले आफ्नो पालिमा दुई चौका प्रहार गरेका थिए । सन्तोष भट्टले २२ रन, अनिलकुमार थापाले ११ रन तथा सुरुआती ब्याट्सम्यान रोशन नेपालीले १० रन जोडेका थिए । कप्तान तथा अर्का सुरुआती ब्याट्सम्यान सुरेन्द्र चन्द तीन रनमा आउट हुँदा तेस्रो क्रमका ब्याट्सम्यान ज्ञानेन्द्र कुँवरले नौ रन, वसन्त कार्कीले आठ रन तथा सागर भण्डारीले ६ रन जोडेका थिए । विनोद लामा ६ रनमै अविजित रहे ।
विनोदले बलिङतर्फ पनि तीन विकेट लिँदा पूर्वाञ्चलको पालि धरापमा परेको थियो । वर्षाले खेल रोकिनुअघि पूर्वाञ्चलका कप्तान पुष्प थापा ६ रन तथा जुगल चौधरी एक रनमा अविजित रहे । अंकित सुवेदी आठ रन, रवि रोय दुई रन तथा मुकुन्द यादव र विधान गोस्वामी शून्य रनमै आउट भएका थिए । अंकित, रवि र मुकुन्दलाई विनोदले आउट गराएका थिए । गोस्वामीलाई सागर भण्डारीले आउट गराएका थिए । दुई ओभर बलिङ गरेका विनोदले मात्र १४ रन दिएर तीन विकेट लिएका थिए । यस्तै सागरले पनि दुई ओभरमा आठ रन दिएर एक विकेट लिएका थिए ।
प्रतिक्रिया दिनुहोस !
