प्रधानन्याधीश विरुद्धको महाअभियोग प्रस्ताव फिर्ता नलिएसम्म बजेट प्रस्तुत गर्न नदिने एमालेको अडान

काठमाडौ : प्रमुख प्रतिपक्षी दल नेकपा एमालेले प्रधानन्यायधीश सुशीला कार्की विरुद्ध लगाइएको महाअभियोग प्रस्ताव फिर्ता नलिएसम्म सरकारलाई व्यवस्थापिका संसदमा बजेट प्रस्तुत गर्न नदिने अडान लिएको छ । एमालेको अडानका कारण ४ बजे प्रस्तुत गर्ने भनिएको बजेट रोकिएको छ ।
एमालेले महाअभियोग प्रस्ताव फिर्ता लिनु पर्ने अडान लिएको छ भने सत्ता पक्षले महाअभियोग प्रस्तावलाई स्थगन गर्न चाहेको छ ।
‘महाअभियोग प्रस्ताव फिर्ता नलिएसम्म सदन सुचारु हुन सक्दैन सत्ता पक्ष नै जिम्मेवार हुनेछ’ एमालेका नेता गोकर्ण विष्टले संसदभवनमा पत्रकारहरुसँग भन्नुभयो । सत्ता पक्षका काँग्रेसका मिन बिश्वकर्मा र माओवादीका टेकबहादुर बस्नेतले महाअभियोग प्रस्तावलाई स्थगन गर्न सभामुख ओनसरी घर्तीलाई आइतवार निवेदन दिनु भएको थियो । काँग्रेस र माओवादीका २४९ जना साँसदहरुको हस्ताक्षरसहित बैशाख १७ गते व्यवस्थापिका संसदमा प्रधानन्यायधीश सुशीला कार्की विरुद्ध महाअभियोग प्रस्ताव दर्ता गरिएको थियो ।
माओवादी केन्द्रका नेता नारायणकाजी श्रेष्ठले आइतवार राती सामाजिक सञ्जालमा महाअभियोग प्रस्ताव स्थगन गर्ने नभएर फिर्ता गर्ने समझदारी भएको स्टाटस लेख्नु भएको थियो ।