काठमाडौं : पाँचतारे होटेल र्याडिसनका प्रबन्ध निर्देशक बीके श्रेष्ठको निधन भएको छ । लामो समयदेखि फोक्सोको क्यान्सरबाट पीडित श्रेष्ठको ६४ बर्षको उमेरमा मंगलबार बिहान भैंसेपाटीस्थित निवासमा निधन भएको हो । । उहाँका श्रीमति र तीन छोरीहरु हुनुहुन्छ । स्वर्गीय श्रेष्ठ पर्यटन क्षेत्रका पायोनियर हुनुहुन्थ्यो । काठमाडौंको लाजिम्पाटमा रहेको पाँचतारे होटल र्याडिसनमा सर्वसाधरणको पनि शेयर छ । उहाँको पोखरास्थित पाँचतारे ग्रान्ड होटेल र चितवनको सौराहामा चितवन प्याराडाइज होटेल सञ्चालनमा छन् ।
'हिमालय टुर एन्ड ट्राभल्स' कम्पनीमार्फत श्रेष्ठ पर्यटन व्यवसायमा प्रवेश गर्नुभएको थियो । उहाँको ट्राभल पुरानो कम्पनीमा पर्छ । 'सानै उमेरदेखि पर्यटन व्यवसायमा होमिनुभएका श्रेष्ठ रोगले ग्रस्त बनाउँदासमेत अफिस गइरहनुहुन्थ्यो' होटल एशोसियसन अफ नेपाल (हान)का महासचिव विनायक शाहले बताउनुभयो ।
श्रेष्ठ बीमा व्यवसायमा पनि सक्रीय हुनुहुन्थ्यो । उहाँले नेपाल उद्योग वाणिज्य महासंघमा डेढ दशकभन्दा बढी समय कार्यकारिणी समिति सदस्य भएर काम गर्नु भएको थियो । महासंघको एशोसिएट सदस्यबाट उपाध्यक्षमा समेत उम्मेदवारी दिनुभएको भएपनि सफल हुन सक्नुभएन । हानका पूर्वअध्यक्ष उहाँले होटेल व्यवसायको उत्थानमा महत्वपूर्ण योगदान पुर्याउनुभएको छ । उहाँ हानमा दुई कार्यकाल प्रथम उपाध्यक्ष हुनुभयो ।
श्रेष्ठ नेपाल जर्मन चेम्बर अफ कमर्शको पुर्वअध्यक्ष समेत हुनुहुन्थ्यो । श्रेष्ठले संघ संगठनमा रहँदा दत्तचित्त भएर काम गर्ने गरेको शाह सम्झनुहुन्छ । पाँचतारे होटेल सञ्चालन गरेर विदेशी मुद्रा आर्जन र रोजगारीमा ठूलो योगदान पुर्याउँदै आउनुभएका उहाँले प्रतिकुल अवस्थामा पनि बिचलित नभई होटेल व्यवसाय टिकाएर अगाडि बढाउनुभएको थियो । 'उहाँले आफ्नो व्यवसायमात्र चलाउनु भएन, समग्र पर्यटन व्यवसायको उत्थानमा महत्वपूर्ण योगदान दिनुभयो' शाहले भन्नुभयो ।
शाहका अनुसार श्रेष्ठ मृदुभाषी र मिलनसार हुनुहुन्थ्यो । लो प्रोफाइलमा बसेर काम गर्ने उहाँको बानी थियो । उहाँले जुन काम गर्नुहुन्थ्यो, फत्ते गरेरै छाड्नुहुन्थ्यो, उहाँमा साँच्चिकै लिडरसीप क्षमता थियो' शाहले भन्नुभयो । रोगले थिचिसक्दा पनि उहाँ अफिस गइरहनुहुन्थ्यो । बन्द हडतालको समयमा पनि उहाँ भैंसेपाटीबाट टिसर्ट लगाएर हिँड्दै र्याडिसन होटेल (अफिस) पुग्ने गरेको शाहको भनाई छ ।
प्रतिक्रिया दिनुहोस !
