बक्सिङको कार्ययोजना सार्वजनिक
काठमाडौं : नेपाल बक्सिङ संघले आफ्नो भावी कार्ययोजना र कार्यतालिका सार्वजनिक गरेको छ । मंगलबार पत्रकार सम्मेलन गर्दै संघले पछिल्लो कार्यविवरण र आगामी दिनको योजना सार्वजनिक गरेको हो ।संघले सार्वजनिक गरेको नयाँ योजनाअनुसार नेपालको प्रजातान्त्रिक आन्दोलनका सर्वमान्य नेता गणेशमान सिंहको स्मृतिमा राष्ट्रिय खुला बक्सिङ प्रतियोगिता असारमा हुने भएको छ ।
असारकै पहिलो साता विद्यालयस्तरीय बक्सिङ प्रशिक्षण कोर्स र युथ बक्सिङ कलेजस्तरीय कोर्स हुनेछ । यस्तै राष्ट्रिय युथ च्याम्पियनसिप असोजमा पोखरामा हुने संघका अध्यक्ष राम अवालेले जानकारी दिए । वार्षिक कार्यक्रमअनुसार कात्तिकमा बूढानीलकण्ठ र चैत्रमा झापामा खुला राष्ट्रिय बक्सिङ प्रतियोगिता हुनेछ ।
यस्तै सन् २०१८ भित्र आफ्नै एकेडेमी बनाउने घोषणा पनि संघले गरेको छ । यस्तै थाइल्यान्ड, भियतनाम र भारतमा तीन अन्तर्राष्ट्रिय प्रतियोगितामा सहभागिता जनाउनेछ । थाइल्यान्डमा जुलाइमा युथ बक्सिङ च्याम्पियनसिप, नोभेम्बरमा भियतनाममा एसियन इलाइट बक्सिङ च्याम्पियनसिप र सेप्टेम्बरमा भारतमा इन्डो नेपाल बक्सिङ च्याम्पियनसिपमा नेपालले सहभागिता जनाउनेछ ।
संघको प्रगति विवरण प्रस्तुत गर्दै अध्यक्ष अवालेले अन्तर्राष्ट्रिय प्रतियोगिता सहभागिताका दौरान उज्वेकिस्तान बक्सिङ संघले बक्सिङ सामग्री दिन लागेको बताए । उनले विभिन्न देशसँग प्राविधिक क्षेत्रमा अन्तर्राष्ट्रिय सम्बन्ध विस्तार गरेको समेत जानकारी दिए ।
गत वर्ष संघले राष्ट्रिय रेफ्री तथा जर्ज रिफ्रेसर, चौथो राष्ट्रिय खुला महिला तथा पुरुष बक्सिङ प्रतियोगिता र प्रथम नोविस च्याम्पियनसिपलगायत कार्यक्रम सम्पन्न गरेको जनाएको छ । जसमा आइबा आईटीओ कोर्स, आइबा युथ च्याम्पियनसिप, आइबा कंग्रेस, थाइल्यान्ड बक्सिङ च्याम्पियनसिप र एसियन बक्सिङ च्याम्पियनसिपलगायतका अन्तर्राष्ट्रिय गतिविधिमा भाग लिएको जनाएको छ । कार्यक्रमका राष्ट्रिय खेलकुद परिषद्का सदस्यसचिव केशवकुमार विष्टले संघलाई चाँडै नै वैधानिकता दिने बताए ।
प्रतिक्रिया दिनुहोस !
