काठमाडौं : प्रमुख प्रतिपक्षी दल नेकपा एमालेको अवरोधपछि व्यवस्थापिका संसद बैठक बिहीबारसम्मका लागि स्थगित भएको छ ।भरतपुर महानगरपालिकाको मतगणना सुचारु गराउन ध्यानाकर्षण गराउँदै एमालेले बुधबारको व्यवस्थापिका संसद बैठक अवरोध गरेको हो ।
एमालेले संसद अवरोध गरेपछि भोलि जेठ १८ गते बिहीबार १ बजेसम्मका लागि बैठक स्थगित भएको छ । संसदमा बोल्दै नेकपा एमालेका नेता सुरेन्द्र पाण्डेले भरतपुर महानगरपालिकाको मतगणना पुःन सुचारु गर्न ध्यानाकर्षण गराउनुभएको थियो ।
पाण्डेले भरतपुरमा फेरी चुनाव गराए गलत नजीर बस्ने भएकाले त्यसो नगर्न आग्रह गर्नुभएको थियो । यदी निर्वाचन भए निर्वाचन आयोगले पाँच वर्षसम्म परिणाम नआउने निर्वाचन गराइरहनुपर्ने र हार्ने परिस्थिति आए मतपत्र च्यात्न दल उत्प्रेरित हुने भएकाले घातक हुने बताउनुभयो । च्यातिएका मतपत्र पनि जोडेर हेर्न सकिने आयोगले निर्देशिका बनाएको र त्यसै अनुरुप मतगणना तत्काल सुचारु गर्न आग्रह गर्नुभयो ।
संसदमा सभामुख ओनसरी घर्तीले प्रतिपक्षको कुरामा आफ्नो ध्यानाकर्षण भएको भन्दै संसद अवरोध नगर्न आग्रह गर्नुभएको थियो ।एमालेका नेताहरु उभिएर विरोध जनाइरहेपछि सभामुख घर्तीले संसद बैठक बिहीबारसम्मका लागि स्थगित गर्नुभएको हो ।
प्रतिक्रिया दिनुहोस !
