पैसा नलाग्ने नम्बरमा फोन गर्नुस् पुनर्निर्माण सम्बन्धी जानकारी लिनुस

काठमाडौँ : निजी आवाससम्बन्धी कुनै गुनासो छ ? पुनर्निर्माणसम्बन्धी कुनै जानकारी चाहिएको छ ? त्यसो हो भने अब पैसा नलाग्ने (टोल फ्री) सेवा उपयोग गर्नुस् ।
राष्ट्रिय पुनर्निर्माण प्राधिकरणले यस्तो सेवा बुधबारदेखि सुरु गरेको हो । अब भूकम्पपीडितलाई आवास निर्माण तथा पुनर्निर्माणसम्बन्धी कुनै जानकारी चाहिए तथा गुनासो गर्नुपरे प्राधिकरणको हेल्पलाइनमा फोन गर्न सक्नेछन् ।
एनटिसी प्रयोगकर्ताले १६६०–०१–७२००० र एनसेल प्रयोगकर्ताले ९८०१५–७२१११ मा फोन गर्दा आवश्यक जानकारी पाउनेछन् । इच्छुकले गुनासो दर्ता गरेको भोलिपल्ट जवाफ पाउनेछन् । प्राधिकरणका तर्फबाट प्रश्नकर्तालाई फोन जानेछ ।
यो सेवा २४ सै घन्टा उपलब्ध छ ।
सो सेवाको प्राधिकरणका प्रमुख कार्यकारी अधिकृत डा.गोविन्दराज पोखरेलले नमूना गुनासो गरी शुभारम्भ गर्नुभएको हो । पोखरेलले पहिलो किस्ता लिइ मापदण्डअनुसार जग हालेको तर दोस्रो किस्ता लिने प्रक्रिया पुरा गर्नका लागि कोही पनि अवलोकन गर्न नआएको नमूना गुनासो गर्नुभएको थियो ।
सेवा उद्घाटन गर्दै डा.पोखरेलले यो सेवा लाखौँ भूकम्पपीडितका लागि अत्यन्त उपयोगी हुने बताउँदै यसले पुनर्निर्माणमा सहयोग गर्ने बताउनुभयो । उहाँले यसले पीडित तथा प्राधिकरणबीच दुईतर्फी संचारमा मद्दत गर्ने पनि विश्वास व्यक्त गर्नुभयो ।
यो सेवा संयुक्त राष्ट्रसंघीय विकास कार्यक्रम युएनडिपीको आर्थिक तथा प्राविधिक सहयोगमा यो सेवा सुरु भएको हो । शुभारम्भ कार्यक्रममा यूएनडीपीकी नेपाल उपनिर्देशक सोफी केम्खाड्जेले यस्तो सेवाले प्राधिकरणले स्थानीय स्तरको अवस्था थाहा पाउन सहयोगी हुने बताउनुभयो ।