नेपाली फुटबलको प्रत्यक्ष प्रसारण अब एपी वान टेलिभिजनमा

 काठमाडौं : नेपाली फुटबल खेलको प्रत्यक्ष प्रसारण अबदेखि एपीवान एचडी टेलिभिजनले गर्ने भएको छ । अखिल नेपाल फुटबल संघ (एन्फा) र एपी वान एचडी टेलिभिजनबीच बिहिबार प्रसारण संझौता पत्रमा हस्ताक्षर भएको छ । संझौता पत्रमा एन्फाका अध्यक्ष नरेन्द्र श्रेष्ठ र एपी वान एचडी टेलिभिजनका प्रवन्ध निर्देशक लक्ष्मी प्रसाद पौडेलले हस्ताक्षर गर्नु भयो ।

संझौता अनुसार एपी वानले प्रसारण सहित फुटबलको मार्केटिङ र प्रायोजनको अधिकार समेत प्राप्त गरेको छ । जसका लागि एपी वानले एन्फालाई फुटबल खेलको विकास र विस्तार गर्न बार्षिक एक करोड ७५ लाख रुपैयाँ प्रदान गर्नेछ ।

उक्त संझौता तीन बर्षका लागि भएको एपी वान एचडी टेलिभिजनका प्रवन्ध निर्देशक लक्ष्मी प्रसाद पौडेलले बताउनुभयो । ‘नेपाली फुटबलको प्रतक्ष प्रसारण सहित मार्केटिङ र स्पोनसरसिपको अधिकार हामीलाई प्राप्त भएको छ । एन्फासँगको यस संझौता फुटबल खेलका लागि नयाँ कोढेटुङ्गा हुनेछ । एपी वान एचडीले नेपाली दर्शकको इच्छालाई समेट्ने प्रयास गर्नेछ । हामी टेलिभिजन मार्फत खेलकुदको जमातलाई जोड्ने प्रयास गर्नेछौं,’ पौडेलले भन्नुभयो । उहाँले एन्फासँगको संझौलालाई एक अवसरको रुपमा लिंदै दर्शकलाई गुणस्तर सहितको फुटबलको स्वाद चखाउने प्रतिबद्धता पनि जनाउनुभयो ।

संझौता अनुसार एन्फाले कम्तीमा बार्षिक ३० वटा राष्ट्रिय स्तरको फुटबल खेल सञ्चालन गर्नुपर्नेछ । विश्व फुटबल महासंघ (फिफा) र एसियाली फुटबल महासंघ (एएफसी) ले नेपालमा आयोजना गर्ने अन्तर्राष्ट्रिय स्तरको प्रतियोगिताको प्रतक्ष प्रसारण गर्ने अधिकार समेत एपीवानलाई हुनेछ । तर अन्तर्राष्ट्रिय खेलको मार्केटिङको अधिकार भने फिफा र एफसीमै सिमिति हुने बताईएको छ ।

यसैगरी एन्फाका अध्यक्ष श्रेष्ठले एपी वान एचडीसँगको संझौता नेपाली फुटबलका लागि नयाँ आयाम भएको बताउनुभयो । ‘एन्फाका लागि यो वीनवीनको क्षण हो । हामीले यसलाई सुखद दिनको रुपमा लिएका छौं । यस संझौताले नेपाली फुटबलले आगामी दिनमा थप गति लिन सहयोग गरेको छ,’ श्रेष्ठले भन्नुभयो । नेपालको एउटैमात्र दशरथ रंगशाला भूकम्पपछि लथालिङ्ग भएको अवस्थामा फुटबल खेललाई चलायमान बनाउने एन्फाको प्रयास जारी रहेको पनि श्रेष्ठले स्पस्ट पार्नुभयो ।

‘सन् २०१७ र २०१८ नेपाली फुटबलका लागि निकै ब्यस्त हुनेछ । हामी प्राविधिक कारणले रोकिएको ‘ए’ डिभिजन लिगको खेल तालिका छिट्टै तयार गर्दैछौं । आगामी दिनमा नेपालमा युवा, महिला र सिनियर स्तरको ठूला अन्तर्राष्ट्रिय प्रतियोगिता समेत सञ्चालन हुँदैछ । एन्फाले शसस्त्र प्रहरी बल (एपीएफ) सँगको सहकार्यमा हल्चोक स्थित एपीएफ मैदानमा फुटबलका गतिविधि सञ्चालन गर्नेछ,’ श्रेष्ठले भन्नुभयो ।

एन्फाले आयोजना गरेको प्रतियोगिता बाहेक मोफसलमा सञ्चालन हुने अन्य प्रतियोगिताका लागि संझौता बाध्यकारी नहुने पनि स्पस्ट पारिएको छ । संझौता कार्यक्रममा एपी वान एचडी टेलिभिजनका निर्देशक सन्देश गुरागाई, एन्फाका प्रथम उपाध्यक्ष मणि कुँवर, प्रमुख कार्यकारी अधिकृत इन्द्रमान तुलाधर, महासचिव धिरेन्द्र प्रधान लगायतको उपस्थिति रहेको थियो ।