काठमाडौं : भौतिक पूर्वाधार तथा यातायात व्यवस्था मन्त्री रमेश लेखकले पूर्वपश्चिम जोड्ने महेन्द्र राजमार्ग पूरै चार लेनको बनाउन दातृ निकायसँग सहकार्य भइरहेको बताउनुभएको छ । आफ्नो १० महिने कार्यकालको समीक्षा गर्दै बिहीबार मन्त्री लेखकले सडकका एक दर्जन आयोजनालाई गति दिइएको दाबी गर्नुभएको छ ।
उहाँले आफ्नो कार्यकालयमा भएको प्रगतिमा महेन्द्र राजमार्गको नारायणगढ-बुटवलसम्मको एक सय १५ किलोमिटर सडक र भैरहवा-लुम्बीनी हुँदै तौलिहवासम्मको ४१ किलोमिटर सडक स्तरोन्नति एसियाली विकास बैंक (एडीबी)को सहयोगमा भइरहेको जानकारी दिनुभयो । यो सडकको पूरै खण्ड चार लेन बनाउने योजना छ । सरकारले एडीबीसँग ठूलो ऋण लिएर भए पनि सडक विस्तार गर्ने उहाँले बताउनुभयो । एडीबी पनि नेपालमा ऋण लगानी गरेर यो मार्ग विस्तार गर्न सकारात्मक रहेको उहाँको भनाइ छ ।
मुग्लिङ-नारायणगढ सडक, मुग्लिन-काठमाडौं सडक, पूर्व—पश्चिम राजमार्गको स्तारोन्नतीदेखि हुलकी राजगर्मा निर्माणले लिएको गति, द्रुतमार्ग निर्माण प्रक्रिया अगाडि बढेको, मध्यपहाडी लोकमार्ग अगाडि बढाइएको मन्त्री लेखकले जानकारी दिनुभयो । उहाँले उत्तर-दक्षिण करिडोरलाई प्राथमिकता दिइएको, चीनसँगको सहकार्यमा नेपाललाई सडक र रेलमार्गको पहुँच बनाउने प्रयास भएको, उच्च पहाडी हिमाली लोकमार्ग, नागढुंगा सुरुङमार्ग निर्माणसहितका योजना अगाडि बढनु आफ्नो कार्यकालको सफलता भएको दाबी गर्नुभयो ।
नारायणगढ-बुटवल सडकखण्ड स्तरोन्नति गर्न १६ अर्ब र भैरहवादेखि लुम्बिनीसम्मको सडकका निम्ति दुई अर्ब गरी एडीबीको कुल १८ अर्ब रुपैयाँ खर्च गरिनेछ । नेपाल सरकारले त्यो रकमको मूल्य अभिवृद्धि कर मात्रै तिर्ने हो । एडीबीसँग महेन्द्र राजमार्गको स्तरोन्नति गर्न थप आर्थिक सहायता खोजिरहेको भौतिक मन्त्रालयको भनाइ छ ।
मन्त्री लेखकका अनुसार नेपालको भौतिक विकासको प्रमुख अवरोध समयमा काम नहुनु र गुणस्तर कम हुनु भएको बताउनुभयो ।
भौतिक प्रगति ६० प्रतिशत
भौतिक मन्त्रालय अन्तर्गत सडक विभागको चालू आवको दोस्रो चौमाससम्मा ६० प्रतिशत भौतिक प्रगति भएको छ । यो अवधिमा वित्तीय प्रगति भने ४५ प्रतिशत भएको मन्त्रालयको दाबी छ । मन्त्री लेखकले यातायात क्षेत्रमा अधिक समस्या रहको भए पनि यो क्षेत्रले राजस्वमा वार्षिक २१ अर्ब रुपैयाँको योगदान गरिरहेको छ ।
प्रतिक्रिया दिनुहोस !
