फुटबलको प्रत्यक्ष प्रसारण एपी वान टेलिभिजनमा
काठमाडौं : नेपाली फुटबल खेलको प्रत्यक्ष प्रसारण अबदेखि एपीवान एचडी टेलिभिजनले गर्ने भएको छ । अखिल नेपाल फुटबल संघ (एन्फा) र एपी वान एचडी टेलिभिजनबीच बिहीबार यससम्बन्धी सम्झौतापत्रमा हस्ताक्षर भएको छ । सम्झौतापत्रमा एन्फाका अध्यक्ष नरेन्द्र श्रेष्ठ र एपी वान एचडी टेलिभिजनका प्रबन्ध निर्देशक लक्ष्मीप्रसाद पौडेलले हस्ताक्षर गरे । सम्झौताअनुसार एपी वानले प्रसारणसहित फुटबलको मार्केटिङ र प्रायोजनको अधिकारसमेत प्राप्त गरेको छ । त्यसका लागि एपी वानले एन्फालाई फुटबल खेलको विकास र विस्तार गर्न वार्षिक एक करोड ७५ लाख रुपैयाँ प्रदान गर्नेछ ।
उक्त सम्झौता तीन वर्षका लागि भएको एपी वान एचडी टेलिभिजनका प्रबन्ध निर्देशक लक्ष्मीप्रसाद पौडेलले बताए । 'नेपाली फुटबलको प्रत्यक्ष प्रसारणसहित मार्केटिङ र स्पोनसरसिपको अधिकार हामीलाई प्राप्त भएको छ । एन्फासँगको यो सम्झौताले फुटबल खेलका लागि नयाँ कोसेढुंगा सावित हुनेछ । एपी वान एचडी टेलिभिजनले नेपाली दर्शकको इच्छालाई समेट्ने प्रयास गर्नेछ । हामी टेलिभिजनमार्फत खेलकुदप्रेमीलाई जोड्ने प्रयास गर्नेछौं', पौडेलले भने ।
उनले एन्फासँगको सम्झौतालाई अवसरको रूपमा लिँदै दर्शकलाई गुणस्तरसहितको फुटबलको स्वाद चखाउने प्रतिबद्धता पनि व्यक्त गरे । सम्झौताअनुसार एन्फाले 'ए' डिभिजन लिग सहित कम्तीमा वार्षिक ३० वटा राष्ट्रियस्तरको फुटबल खेल सञ्चालन गर्नुपर्नेछ । विश्व फुटबल महासंघ (फिफा) र एसियाली फुटबल महासंघ (एएफसी) ले नेपालमा आयोजना गर्ने अन्तर्राष्ट्रिय स्तरको प्रतियोगिताको प्रत्यक्ष प्रसारण गर्ने अधिकारसमेत एपी वानलाई हुनेछ । तर अन्तर्राष्ट्रिय खेलको मार्केटिङको अधिकार भने फिफा र एफसीमै सीमित रहने बताइएको छ ।
यसैगरी एन्फाका अध्यक्ष श्रेष्ठले एपी वान एचडी टेलिभिजनसँगको सम्झौता नेपाली फुटबलका लागि नयाँ आयाम भएको बताए । 'एन्फाका लागि यो विन विनको क्षण हो । हामीले यसलाई सुखद दिनको रूपमा लिएका छौं । यो सम्झौतापछि नेपाली फुटबलले आगामी दिनमा थप गति लिने विश्वास पनि लिएका छौं', श्रेष्ठले भने । नेपालको एउटैमात्र दशरथ रंगशाला भूकम्पपछि लथालिंग अवस्थामा रहे पनि फुटबल खेललाई चलायमान बनाउने एन्फाको प्रयास जारी रहेको श्रेष्ठले बताए ।
'सन् २०१७ र सन् २०१८ नेपाली फुटबलका लागि निकै व्यस्त हुनेछ । हामी प्राविधिक कारणले रोकिएको 'ए' डिभिजन लिगको खेल तालिका छिट्टै तयार गर्दैछौं । आगामी दिनमा नेपालमा युवा, महिला र सिनियर स्तरका ठूला अन्तर्राष्ट्रिय प्रतियोगितासमेत सञ्चालन हुँदैछन् । एन्फाले सशस्त्र प्रहरी बल (एपीएफ) सँगको सहकार्यमा हल्चोकस्थित एपीएफ मैदानमा फुटबलका गतिविधि सञ्चालन गर्नेछ', श्रेष्ठले भने ।
एन्फाले आयोजना गरेको प्रतियोगिता बाहेक मोफसलमा सञ्चालन हुने अन्य प्रतियोगिताका लागि सम्झौता बाध्यकारी नहुने पनि स्पष्ट पारिएको छ । सम्झौता कार्यक्रममा एपी वान एचडी टेलिभिजनका निर्देशक सन्देश गुरागाईं, एन्फाका प्रथम उपाध्यक्ष मणि कुँवर, प्रमुख कार्यकारी अधिकृत इन्द्रमान तुलाधर, महासचिव धीरेन्द्र प्रधानलगायतको उपस्थिति थियो ।
प्रतिक्रिया दिनुहोस !
