चलचित्र 'तारेभीर'बाट रजतपटमा डेब्यु गरेकी नायिका रेखा फागो मोडलिङबाट चलचित्र क्षेत्रमा आएकी हुन् । एक दर्जनभन्दा बढी म्युजिक भिडियोमा मोडलिङ गरेपछि उनी चलचित्र क्षेत्रमा आएकी हुन् । धरानमा बसेर मोडलिङ एवं अभिनय यात्रालाई अगाडि बढाएकी उनी अब राजधानीमा बसेर कला यात्रालाई निरन्तरता दिने सोचमा छिन् । ५ फिट ४ इन्च अग्लि २२ वर्षिया रेखा र अशोकप्यासी राईबीच भएको कुराकानी :
पहिलो पटक सिनेमा हलमा आफूलाई हेर्दा कस्तो लाग्यो ?
आफूलाई पर्दामा देख्दा कति खुसी छु कति । एकदमै रमाइलो र उत्साहित भएँ । चलचित्र हेर्नेहरू सबैले प्रशंसा गर्नुभएको छ । मेरो लागि यो महत्वपूर्ण कुरा हो ।
के कुराले त्यति उत्साहित बनायो ?
सानोमा चलचित्र हेर्दा त्यसरी नै पर्दाभित्र पस्न पाए हुन्थ्यो जस्तो लाग्थ्यो । म कति कल्पना गर्थें । त्यो सपना अहिले साकार भएको छ । यही कुराले म बढी उत्साहित भएकी हुँ ।
दर्शकले के कुरा मन पराए ?
चलचित्रको विभिन्न स्थानमा च्यारिटी सो भएको छ । मलाई वास्तविक जीवनमा हेर्ने बुझ्नेहरूले उसले यति राम्रो गर्न सक्छ र भनेका छन् ।
अब हिरोइन भएजस्तो लाग्न थालेको होला ?
हिरोइन भएँभन्दा पनि सपना पूरा भएको छ । अब यसलाई अझ राम्रो ढंगले अगाडि बढ्नुपर्छ, सिक्नु धेरै छजस्तो अनुभूति हुन्छ ।
अभिनय, मोडलिङमा परिवारको भनाई?
चलचित्रको च्यारिटी सोमा सबै परिवार सहभागी हुनुहुन्थ्यो । चलचित्र हेरिसकेपछि सबैले प्रशंसा गर्नुभयो । तिमीले गर्न सक्ने रहेछौ, अझ मेहनत गरेर अघि बढ्नु भनेर सल्लाह दिनुभयो ।
चलचित्र क्षेत्रमा आउनुभन्दा अगाडि चाहिँ के भन्नुहुन्थ्यो ?
यो क्षेत्रमा मलाई परिवारको साथ र सहयोग छ । यो स्थानसम्म पुग्नुमा परिवारकै साथले सम्भव भएको हो ।
स्क्रिप्टमा भने अनुसारको चलचित्र बन्यो त ?
मलाई चाहिँ बनेजस्तो लाग्छ । निर्देशक प्रेम सुब्बाले मलाई जस्तो भूमिका सुनाउनुभएको थियो त्यो चलचित्रमा छ । चलचित्रमा मेरो भर्सटाइल भूमिका छ । एक्सन, डान्स, इनोसेन्ट सबै छ । चलचित्र हेर्दा पनि राम्रो लाग्यो ।
चलचित्रको कुन पक्ष दर्शकले रुचाए ?
चलचित्र हेर्दा अधिकांश दर्शकको आँखा रसाएको हुन्छ । चलचित्रले दर्शकको मन छुनु ठूलो कुराजस्तो लाग्छ।
तपाईं त रुनु भएन होला ?
म त छायांकन गर्दा नै रोएको थिएँ । हलमा चलचित्र हेर्दा पनि रोएँ । मेरो मन कमलो छ ।
सुरुमा चलचित्रका लागि प्रस्ताव आउँदा कस्तो लाग्यो ?
मलाई त सपनाजस्तो लागेको थियो । म पनि हिरोइन बन्छु र जस्तो लाग्यो । खुसी, आश्चर्य, चाहना सबै कुराको समि श्रणले रोमाञ्चक अनुभूति भएको थियो ।
चलचित्रको छायांकनमा पहिलो सट दिएको अनुभव याद छ ?
म अलि नर्भस थिएँ । हुन त त्यसअघि मैले धेरै म्युजिक भिडियोमा मोडलिङ गरेकी थिएँ तर चलचित्रको टिम ठूलो हुने भएकाले पहिलो दिन नर्भस हुनु स्वाभाविकै थियो ।
चलचित्रमा अभिनय गर्न नसक्ने रहेछु जस्तो त लागेन ?
त्यस्तो त लागेन । निर्देशक प्रेमदाइका साथै सम्पूर्ण टिमबाट राम्रो साथ र सहयोग पाएँ । एकपछि अर्को गर्दै आत्मविश्वास बढ्न थाल्यो । फेरि मनले चाहेको क्षेत्रमा काम गर्नुको मजा पनि बेग्लै हुन्छ ।
म्युजिक भिडियो चाहिँ कति भए ?
एक दर्जनभन्दा बढी भयो । मैले मोडलिङ गरेको पहिलो भिडियो रजिना रिमाल र भीषण राईले गाएको 'तिम्रो माया साह्रै नि लाग्छ नि' हो ।
चलचित्र र म्युजिक भिडियो कुनमा काम गर्दा रमाइलो ?
म्युजिक भिडियोमा सानो टिम, छोटो समय हुन्छ । चलचित्रमा ठूलो टिम र धेरै समय लाग्छ । मलाई दुवै क्षेत्रमा उत्तिकै रमाइलो लाग्छ ।
अबको योजना ?
मोडलिङ, अभिनय मेरो रुचिको क्षेत्र हो । अहिलेसम्म धरानमा बसेर पढ्दै यस क्षेत्रमा काम गरेँ । अब राजधानीमै आएर संघर्ष गर्ने योजना बनाएकी छु । यो क्षेत्रबाट म निकै आशावादी छु ।
प्रतिक्रिया दिनुहोस !
