काठमाडौं ट नेपालकै पहिलो अन्तर्राष्ट्रिय फ्रान्चाइज टेलिभिजन सो, ‘नेपाल आइडल' लाई अन्तर्राष्ट्रिय मोबाइल फोन ब्रान्ड ओप्पोले प्रमुख प्रायोजकको रूपमा सहयोग गरेको छ । उत्कृष्ट गायनकला भएर पनि अवसरको अभावमा मुलधारमा नआएका नेपाली प्रतिभालाई अवसर प्रदान गर्ने सोचका साथ ओप्पोले नेपाल आइडल कार्यक्रमको प्रायोजन गरेको कम्पनीका ब्रान्ड म्यानेजर माइकल लीले बताउनुभयो । उहाँले हामी विज्ञापनका लागिमात्र प्रायोजन गर्न चाहँदैनौ । हाम्रो लगानीले देशमा रहेका समस्या केही मात्रामा भए पनि समाधान होस् भन्ने उद्देश्य रहेको उहाँले बताउनुभयो । अन्तर्राष्ट्रिय बजारका साथै नेपालमा पनि ओप्पोले सामाजिक उद्देश्यपूर्तिका लागि प्रयास गरिरहेको उहाँले उल्लेख गर्नुभयो ।
नेपाल आइडलको प्रायोजन यसैको उपज भएको कम्पनीले जनाएको छ । अहिले ६ अर्ब ५० करोड मानिसले ‘आइडल' प्रोग्राम हेर्ने गरेका छन् । रियालिटी टेलिभिजन गायन प्रतिस्पर्धा ‘आइडल्स' को ढाँचा ब्रिटिस टेलिभिजन प्रोड्युसर सायमन फुलरले तयार पार्नुभएको हो । यसको विकास फरमेन्टल मिडियाले गरेको थियो । सन् २००१ मा ब्रिटिस टेलिभिजन सिरिज पप आइडलका रूपमा सञ्चालन गरिएको आइडल सिरिजलाई पहिलो पटक पोलिस सिरिजका रूपमा सन् २००२ मा ‘एडप्टेसन' गरिएको हो । लगत्तै कार्यक्रम विश्वमै सर्वाधिक हेरिने टेलिभिजन फ्रान्चाइजका रूपमा स्थापित हुँदै गएको छ ।
कार्यक्रममा अपनाइएको ढाँचा विश्वका ४६ क्षेत्र र एक सय ५० भन्दा बढी देशमा परिमार्जित ढाँचासहित प्रसारण हुँदै आएको छ । कार्यक्रमका परिमार्जित संस्करण विश्वभरका ६ अर्ब ५० करोड दर्शकले हेर्ने गरेका छन् । आइडलबाटै युनाइटेड किङ्डमका विल योङ्, अमेरिकाका केली क्लार्कसन र क्यारी अन्डरउड, अस्ट्रेलियाका गाय सिबेस्टिनलगायतले आफ्नो परिचय बनाइसकेका छन् ।
त्यसैगरी कार्यक्रममा उपस्थितिकै कारण अभिनयलगायत क्षेत्रमा नाम कमाउने धेरै छन् । एकेडेमी अवार्ड विजेता जेनिफर हड्सन सुप्रसिद्ध नाम हो । नेपालमा पनि अहिले आइडल संस्करणले अत्यधिक चर्चा तथा लोकप्रियता पाइरहेको छ । कार्यक्रमको बढ्दो क्रेज र युट्युब, फेसबुकलगायत सामाजिक सञ्जालमा यसको चर्चा कार्यक्रम सफलताको प्रमाण हो । कम्पनीका अनुसार नेपालमा यसको प्रायोजनले नयाँ प्रतिभा जन्माउन सहयोग गर्ने कम्पनीको विश्वास छ । आइडलको नेपाली संस्करण ‘नेपाल आइडल' एपीवान टेलिभिजनबाट प्रसारण भइरहेको छ ।
प्रतिक्रिया दिनुहोस !
