त्रिभुवन विमानस्थलमा चारवटा पार्किङ वे थपिँदै

 काठमाडौ :  बढ्दो हवाई पार्किङ समस्या समाधानका लागि विमानस्थलले आगामी दुई वर्षभित्र सम्पन्न गर्ने गरी दुई ठाउँमा चारवटा साना तथा ठूला जहाज ‘पार्किङ वे' निर्माण कार्यलाई तीव्रता दिएको छ ।

जहाज ‘पार्किङ वे' समस्याकै कारण लामो समयदेखि जहाज आकाशमै होल्ड हुने समस्या बढ्दो छ । विमानस्थलले पार्किङ वे समस्याका कारण नयाँ जहाज कम्पनीलाई दिउँसोको समयमा नयाँ उडान तालिका दिन सकेको छैन । जहाज पार्किङ समस्या न्यूनीकरण गर्न विमानस्थलले खाली ठाउँमा चारवटा साना तथा ठूला जहाज पार्किङ गर्न मिल्ने गरी ‘पार्किङ वे' निर्माणको कामलाई तीव्रता दिएको हो ।

विमानस्थलले आफ्नो स्रोतबाट बढ्दो जहाज पार्किङ समस्या समाधानका लागि ‘पार्किङ वे' निर्माण थालेको सिभिल इन्जिनियरिङ विभागका उपनिर्देशक मुराहरी भण्डारीले जानकारी दिनुभयो ।

‘पूर्वतर्फ पार्किङ रिमोट एयरक्राफ्ट जहाज ‘पार्किङ वे' निर्माणको काम २५ प्रतिशत पूरा भइसकेको छ', भण्डारीले भन्नुभयो, ‘आवश्यक माटो अभाव नभएमा आगामी आर्थिक वर्षको अन्त्यसम्म एउटा ठूलो र अर्को मध्यमखालको जहाज ‘पार्किङ वे' निर्माण सम्पन्न हुनेछ ।'

अहिले खाडलमा माटो भर्ने र पर्खाल लगाउने काम भइरहेको छ । करिब ३४ करोड रुपैयाँ लागतमा निर्माण हुने पार्किङ वेमा करिब एक लाख १० हजार घनमिटर माटो ल्याई पुर्ने काम पूरा भइसकेको उहाँले जानकारी दिनुभयो । आवश्यक ४० हजार घनमिटर माटो ल्याउन बाँकी रहेको अवस्थामा मनसुनले केही असर गर्ने उहाँ बताउनुहुन्छ ।

यसैगरी विमानस्थलको नागगरिक उड्डयन तालिम केन्द्रको भवन रहेको ठाउँमा दुईवटा ठूला जहाज पार्किङ वे निर्माणका लागि विमानस्थलले टेन्डर आह्वान गरिसकेको छ । तालिम भवन विनाशकारी भूकम्पले क्षति गरेपछि सोही ठाउँमा माटो भरेर ‘पार्किङ वे' निर्माण गर्न लागिएको भण्डारी बताउनुहुन्छ ।

करिब ५२ करोड रुपैयाँको लागतमा निर्माण हुने ‘पार्किङ वे' को काम आगामी दुई वर्षभित्र सम्पन्न गर्ने विमानस्थलको तयारी छ ।

अहिले भवन भत्काउने काम भइरहेको छ । भवन भत्काउने काम सकिएलगत्तै पर्खाल लगाएर माटो भर्ने काम अगाडि बढ्ने उहाँले जानकारी दिनुभयो । करिब ५२ करोड रुपैयाँको लागतमा निर्माण हुने उक्त ‘पार्किङ वे' को काम आगामी दुई वर्षभित्र सम्पन्न गर्ने विमानस्थलको तयारी छ ।

पार्किङ वे निर्माणका लागि करिब एक लाख ५० हजार घनमिटर माटो आवश्यक पर्छ । माटो अभाव नभएको अवस्थामा समयमै काम सम्पन्न हुने उहाँको भनाइ छ । पछिल्लो समय विमानस्थल निर्माणको काममा माटो अभाव नै प्रमुख समस्या छ ।

कतिपय अवस्थामा माटो ल्याउन पनि सरकारी निकायको सहमति आवश्यक पर्छ । निर्माण कम्पनीले प्रयोग गर्ने माटो पनि गुणस्तर जाँच गरेरमात्र प्रयोग गर्नु पर्ने हुँदा जुनसुकै ठाउँको माटो प्रयोग गर्ने अवस्था नरहेको भण्डारीले बताउनुभयो ।

अन्तर्राष्ट्रिय त्रिभुवन विमानस्थलमा अहिले पार्किङ वे समस्याका कारण उडान तालिकामा समस्या आएको विमानस्थल कार्यालयका प्रवक्ता प्रेमनाथ ठाकुरले जानकारी दिनुभयो । विमानस्थलमा रहेका नौवटा पार्किङ वेमा मात्रै जहाज पार्किङ गर्न सक्ने अवस्था नभएपछि समस्या आएको हो । पार्किङ समस्याकै कारण जहाज आकाशमै होल्डमा राख्नु पर्ने अवस्था आएको ठाकुर बताउनुहुन्छ । निर्माणधीन चारवटा जहाज पार्किङ वे निर्माण भएपछि जहाज होल्डको समय पनि शून्य हुने उहाँ बताउनुहुन्छ ।