प्रचण्डको प्रस्तावमा प्रधानमन्त्री पदमा देउवाको उम्मेदवारी दर्ता

काठमाडौं :  कांगेस सभापति शेरबहादुर देउवाले प्रधानमन्त्री पदका लागि आफ्नो उम्मेदवारी व्यवस्थापिका संसदमा दर्ता गराउनुभएको छ । देउवाको उम्मेदवारी दर्तामा नेकपा माओवादी केन्द्रका अध्यक्ष पुष्कमल दाहाल प्रस्तावक र कांग्रेसका वरिष्ठ नेता रामचन्द्र पौडेल  समर्थक रहनुभएको छ। 

 

 

देउवाले उम्मेदवारी दर्ता गराउनु अघि काँग्रेस र माओवादीका नेताहरुको संसद भवन बानेश्वरमा बैठक बसेको थियो ।

नेपाली कांग्रेस–नेकपा माओवादीको गठबन्धनबाट देउवाले प्रधानमन्त्री पदमा आफूलाई निर्वाचित गराइयोस् भनी उम्मेदवारी दर्ता गराउनुभएको हो।संविधानको धारा २९८ को उपधारा ३ बमोजिम नेपालको प्रधानमन्त्री पदमा निर्वाचित गरियोस भनी देउवाले उम्मेदवारीको सूचना संसदमा पेश गर्नु भएको हो । डढेलधुरा क्षेत्र नम्बर १ बाट निर्वाचित ७१ बर्षीय देउवाले अव आफूलाई प्रधानमन्त्रीमा निर्वाचित गराउन साँसदहरुसँग छलफल गर्नु हुनेछ । 

कांग्रेस कार्यसम्पादन समितिको बैठकले शेरबहादुर देउवालाई प्रधानमन्त्रीको उम्मेदवार बनाउने सर्वसम्मत निर्णय गरेको थियो ।

काँग्रेसका प्रमुख सचेतक चिनकाजी श्रेष्ठका अनुसार बरिष्ठ नेता पौडेलले प्रधानमन्त्री भएर पार्टीलाई पनि एक ढिक्का बनाएर अगाडि बढाउन  सुझाव दिनु भएको थियो । ‘हामीले सर्वसम्मत रुपमा शेरबहादुर देउवालाई प्रधानमन्त्रीको उम्मेदवार बनाउने निर्णय गरेका छौ’श्रेष्ठले भन्नुभयो । 

 

संसदमा कायम रहेको संख्या ५९३
बहुमतका लागि २९७
सत्ता गठबन्धनसँग कायम रहेको संख्या ३१०

काँग्रेस २०७
माओवादी केन्द्र ८१
नेपाल लोकतान्त्रिक फोरम १७
नेकपा संयुक्त ३
अखण्ड नेपाल १
समाजवादी जनता पार्टी १
जम्मा ३१०