११ सहसचिव र १५ उपसचिवको सरुवा

काठमाडौं : गृह मन्त्रालयले ११ सहसचिव र १५ जना उपसचिवको सरुवा तथा पदस्थापन गरेको छ । सेवा अवकाश, निमित्तको समयावधि पूरा भएकोलगायत कारण पछिल्लो सरुवा भएको गृह मन्त्रालय स्रोतले जनाएको छ ।सुरक्षा समन्वय महाशाखा प्रमुख एवं गृह मन्त्रालयका प्रवक्ता बालकृष्ण पन्थीलाई काठमाडौंको प्रमुख जिल्ला अधिकारी (सिडिओ) मा सरुवा गरिएको छ ।

गृहले पन्थीलाई काठमाडौं सिडिओको रिक्त पदमा सरुवा गरेको हो । जेठ १० गते हिमनाथ दवाडीले अवकाश पाएपछि काठमाडौं सिडिओविहीन थियो । काभ्रेको सिडिओ रहेकै बेला करिब आठ महिनाअघि उहाँलाई गृह मन्त्रालय सरुवा गरेर महत्वपूर्ण जिम्मेवारी दिइएको थियो । पन्थी डोल्पा, बझाङ, पर्वत, सल्यान, पाल्पा, सिरहा, नवलपरासी, रुपन्देही, बारा र काभ्रेपलाञ्चोकको सिडिओ भइसक्नुभएको छ ।

'निर्णय पहिल्यै भइसकेको थियो, पत्र मात्र भर्खरै पाएको हुँ । अब आइतबारदेखि जिम्मेवारी सम्हाल्छु', पन्थीले भन्नुभयो । गृहले सुरक्षा समन्वय महाशाखाको प्रमुखमा ललितपुरका सिडिओ दीपक काफ्लेलाई पठाएको छ । काफ्लेको ठाउँमा मानव स्रोत व्यवस्थापन महाशाखाका प्रमुख रामकुमार श्रेष्ठलाई लगिएको छ । श्रेष्ठ गृह मन्त्रालय आउनुअघि सुर्खेतको सिडिओ हुनुहुन्थ्यो ।

मन्त्रालयका दुई सहसचिव र चार उपसचिवको सरुवा भएको छ भने दुई सहसचिवको पदस्थापन गरिएको छ । भर्खरै सहसचिव हुनुभएका रितेश शाक्यलाई तनहुँ र महेश आचार्यलाई धादिङको सिडिओ बनाएर पठाइएको छ । यी जिल्ला यसअघि निमित्तको भरमा थिए । सिडिओमा निमित्तलाई ६ महिनाभन्दा बढी काम लगाउन नपाइने प्रावधान छ । हाल डोटी, सप्तरी, सिन्धुपाल्चोक र सर्लाहीको सिडिओ पनि निमित्त छन् ।

उपसचिव सुनील खनाल (मनाङ), रामचन्द्र तिवारी (मुस्ताङ), प्रकाशचन्द्र अधिकारी (दैलेख) र राजेश पन्थी (पर्वत) मन्त्रालयबाट सिडिओ बनेर जिल्ला पुग्नुभएको छ । कास्कीका सिडिओ हरि मैनाली र बाग्लुङका सिडिओ भागिरथ पाण्डेलाई मन्त्रालयमा ल्याइएको छ । यी दुवै सहसचिवको जिम्मेवारी भने तोकिएको छैन ।

सहसचिवको सरुवा मन्त्रीस्तरीय निर्णयमा र उपसचिवको सरुवा सचिवस्तरीय निर्णयमा हुने गर्छ । निजामती कर्मचारीको हकमा एक ठाउँमा दुई वर्षभन्दा बढी नराख्ने प्रचलन छ । तर, सिडिओको हकमा बढीमा एक वर्ष र आवश्यकताअनुसार जतिबेला पनि सरुवा हुने व्यवस्था छ ।