चुनावपछि घर बनाउने चटारो

गोरखा : चुनावी चटारो सकेर आरुघाट गाउँपालिका ६ आप्रिकका बासिन्दा भूकम्पले भत्काएको घर बनाउने काममा तल्लीन हुन थालेका छन् । करिब दुई हप्ताको चुनावी अलमलपछि उनीहरू फेरि घर बनाउने काममा व्यस्त हुन थालेका हुन् ।

पुराना मौलिक करिब दुई सयमध्ये सबै घर भूकम्पले ध्वस्त भएपछि आप्रिकका बासिन्दा अहिले जस्ताले बारेको टहरोमा बसोवास गरिरहेका छन् । सरकारले दोस्रो किस्ता अनुदान नदिए पनि अहिलेसम्म करिब १४ वटा घर पुनर्निर्माण गरिसकेको स्थानीय खेमबहादुर गुरुङले बताउनुभयो ।

‘चुनावका बेला १०-१५ दिनजति काम बन्द भयो', गुरुङले भन्नुभयो, ‘अहिले फेरि काम सुरु भइसक्यो । अहिले एकैपटक तीनचारवटा घर बन्दै छन् ।' तर जति घर बनाए पनि प्राविधिकले पास हुँदैन मात्र भनेर हैरान पारेको उहाँले गुनासो गर्नुभयो ।

सबै घर भूकम्पले ध्वस्त भएपछि आप्रिकका बासिन्दा अझै पनि जस्ताले बारेको टहरोमै बसोवास गर्न बाध्य छन् ।

संस्थाहरूले दिएको तालिमले धोका दिएको आप्रिकबासीको गुनासो छ । कान्तिपुर नामक संस्थाले तालिम दिएअनुसार बनाएका सबै घर प्राविधिकले पास नगरिदिएको स्थानीय चेप्टी गुरुङको गुनासो छ । सरकारले घरिघरि मापदण्ड परिवर्तन गरेर बनाएको घर फेल गरिदिने गरेको उहाँको गुनासो छ । ‘पहिले काठको बन्धन राखेर बनाए पनि हुन्छ भन्यो, कसैलाई ६ वटा मात्र रड राखेर बनाए पनि हुन्छ भन्यो । त्यस्तै बनाइयो । पछि आएर फेल गरिदियो', उहाँले भन्नुभयो, ‘आफ्नो घर हो, कसले कमजोर बनाउँछ र ? यस्तो दुःख गरेर, मन लगाएर बनाएको घर भएन भन्दिन्छन् । आरसीसी गरेर बनाएको घर पनि मिलेन भन्दिन्छन् ।'

चुनावका बेला नेता आएर जस्तोसुकै घर बनाए पनि पास हुन्छ भनेर मख्ख पार्ने गरेको उहाँले बताउनुभयो । ‘चुनावको बेला भाषणमा नेताहरूले अहिले फेल भएका घरलाई पनि पैसा दिने कुरा गरेका थिए', उहाँले भन्नुभयो, ‘अब जनप्रतिनिधिले पास गरिदिन्छन् कि भन्ने आस छ ।'

घर नबनेकाले यो बर्खामा पनि टहरोमै बिताउनुपर्ने चिन्तामा धेरै किसान छन् । ‘रातदिन पानी पर्छ । धान, मकै, कोदो राख्ने कहाँ, आफू बस्ने कहाँ । बिचल्ली छ', अर्का स्थानीय सुकबहादुर गुरुङले भन्नुभयो, ‘अब गाउँकै प्रतिनिधिले जितेपछि केही होलो हुन्छ कि ? ' भोट माग्न आएका नेताले अबदेखि भूकम्पपीडितको समस्या निदान गर्ने आश्वास दिएको उहाँको भनाइ छ ।