लण्डनमा आतंकवादी आक्रमण, ६ को मृत्यु ३० घाइते

एजेन्सी : संयुक्त अधिराज्यको राजधानी लण्डनमा अज्ञात समूहले गरेको आक्रमणमा परी ६ जनाको मृत्यु भएको छ भने ३० भन्दाबढी घाइते भएका छन् । शनिबार राति आक्रमणकारीले लण्डनको बरो मार्केटमा रहेका व्यक्तिहरुमाथि चक्कु प्रहार गर्नुकासाथै लण्डन ब्रीजमा हिडिरहेका यात्रुमाथि तीब्र गतिमा आइरहेको गाडी चढाइ आक्रमण गरेका हुन् । यी दुवै आक्रमणमा परी हालसम्म ६ जनाको मृत्यु भएको लण्डन प्रहरीले पुष्टि गरेको छ भने ३० भन्दा बढी घाइते भएका छन् । मृत्यु हुनेको संख्या बढ्न सक्ने बताइएको छ ।

आक्रमणको जानकारी पाए लगतै पुगेको प्रहरीले तत्कालै तीन आक्रमणकारीलाई मारेको र अन्य आक्रमणकारीको खोजी भइरहेको बताएको छ । प्रत्यक्षदर्शीहरुले बतानए अनुसार सुरुमा तीब्र गतिमा आएको गाडी लण्डन ब्रीजमा हिडिरहेका पैदल यात्रुमाथि चढाइयो ।तत्कालै सो गाडिलाई नजिकै रहेको बरो मार्केटमा लगेर रोकियो । त्यसपछि आक्रमणकारीहरुले गाडिबाट निस्किएर त्यहाँ रहेका सर्वसाधारणमाथि अन्धाधुन्ध चुक्कु प्रहार गरेका थिए ।

बेलायती प्रधानमन्त्री टेरिजा मेले यो आक्रमण आतकंवादी आक्रमण भएको र तीब्र गतिमा छानबिन भइरहेको बताउनु भएको छ।  दुईसाता अघिमात्रै बेलायतको म्यान्चेस्टरमा एक कन्सर्ट कार्यक्रममा बम आक्रमण गरिएको थियो । जसमा २२ जनाले ज्यान गुमाएका थिए ।