काठमाडौँ : राष्ट्रिय प्रजातन्त्र पार्टीले प्रधानमन्त्रीका उम्मेदवार शेरबहादुर देउवालाई समर्थन गर्ने वा नगर्नेबारेमा अनिर्णित बनेको छ । व्यवस्थापिका–संसदमा आज हुने प्रधानमन्त्रीको निर्वाचनका लागि समर्थन गर्ने या नगर्नेबारे राप्रपाले स्पष्ट निर्णय गर्न नसकेको हो ।
पार्टीका अध्यक्ष कमल थापाको अध्यक्षतामा आइतबार बिहान बसेको केन्द्रीय कार्यसम्पादन समिति, पदाधिकारी तथा सांसदको बैठकले निर्णय गर्ने जिम्मेवारी संसदीय दललाई दिएको छ ।
राप्रपाका प्रवक्ता सुशील श्रेष्ठले नयाँ प्रधानमन्त्रीका पक्ष तथा विपक्षमा मतदान गर्नका लागि टुङ्गो लगाउन नसकेको जानकारी दिनुभयो । श्रेष्ठले आवश्यक निर्णय लिन संसदीय दललाई जिम्मेवारी दिइएको जानकारी दिनुभयो ।
बैठकमा अधिकांश सहभागीले नयाँ प्रधानमन्त्रीका पक्षमा मतदान गरी सरकारमा जान सुझाव दिएका थिए । तर अध्यक्ष कमलल थापाले त्यसलाई नकारेपछि निर्णय लिन नसकिएको बताइएको छ । संसदीय दलको बैठक आजै साँझ बस्ने छ । रासस
प्रतिक्रिया दिनुहोस !
