महिला भलिबललाई क्वायरटुफको प्रायोजन
काठमाडौं : शेरबहादुर खड्का स्मृति प्रतिष्ठानको आयोजनामा मंगलबारबाट सुरु हुने केएनपी राष्ट्रिय महिला भलिबल प्रतियोगिताका लागि क्वायरटुफ म्याट्रेसले एक लाख ५० हजार रुपैयाँको प्रथम पुरस्कार प्रायोजन गरेको छ । शान्तिनगरस्थित स्ट्याटस ट्रेडिङको कार्यालयमा कार्यकारी निर्देशक सुरेन्द्र सारडाले प्रतिष्ठानका अध्यक्ष रञ्जन खड्कालाई एक लाख ५० हजारको चेक हस्तान्तरण गरे ।
कराँतेका पूर्वखेलाडीसमेत रहेका सारडाले राष्ट्रको पहिचान र एकताका प्रतीकका रूपमा रहेको खेल क्षेत्रमा सहयोग गर्न पाउँदा खुसी लागेको बताऐ । दोस्रो राष्ट्रिय खेलकुदमा सगरमाथा अञ्चलबाट व्यवस्थापकको भूमिका निर्वाह गरेका सारडाले खेल क्षेत्रका बारेमा सदैव चिन्तित रहँदै आएको जनाउँदै राष्ट्रिय खेल भलिबलसँग जोडिन पाउँदा गौरवान्वित भएको बताए ।
सारडाकै अर्को कम्पनी जेम फ्लोरिङले प्रतियोगिताको सर्वोकृष्ट खेलाडीको नगद पुरस्कार १५ हजार तथा अन्य आठ विधागत पुरस्कारको समेत प्रायोजन गर्ने भएको छ ।जेठ २६ गतेसम्म सञ्चालन हुने चारदिने प्रतियोगितामा बेस्ट स्पाइकर, बेस्ट क्विकर, बेस्ट सेटर, बेस्ट ब्लकर, बेस्ट डिफेन्स, बेस्ट सर्भर र बेस्ट कोचले जनही तीन हजार हजार रुपैयाँसहित आकर्षक ट्रफी प्राप्त गर्नेछन् ।
प्रतियोगिताको मुख्य प्रायोजन केएनपी जापानले गरेको छ । यस्तै सह-प्रायोजकमा शिवम् सिमेन्ट रहेको छ भने प्रतियोगिताको विशेष सहयोगीका रूपमा राष्ट्रिय खेलकुद परिषद्, नेपाल भलिबल संघ, आईएमई रेमिट, डल्फिन चियर, एयर एसिया, मेरिडिन पोलिक्लिनिक रहेका छन् ।
त्रिपुरेश्वरस्थित राखेप कभर्डहलमा सञ्चालन हुने प्रतियोगिताको विजेताले नगद एक लाख ५० हजार रुपैयाँ प्राप्त गर्ने छन् भने उपविजेताले एक लाख र तेस्रो हुने टोलीले ५० हजार रुपैयाँ प्राप्त गर्नेछन् ।
प्रतिक्रिया दिनुहोस !
