काठमाडौं : उत्तरी छिमेकी चीनले नेपालमा गठित नयाँ सरकारसँग मिलेर काम गर्न चाहेको बताएको छ । चिनियाँ विदेश मन्त्रालय बेइजिङमा आयोजित पत्रकार सम्मेलनमा प्रवक्ता हुआ चुनयिङ्ले भन्नुभयो, ‘चीन-नेपालबीचको सम्बन्धलाई अझ सुदृढ गर्दै नयाँ सरकारसँग मिलेर काम गर्न चीन इच्छुक छ।'
एक असल छिमेकीको नाताले चीनले नेपालमा राष्ट्रिय एकता, सामाजिक स्थिरता र आर्थिक विकासका लागि नयाँ उपलब्धि हासिल हुने आशा राखेको प्रवक्ता चुनयिङले बताउनुभयो ।
उहाँले नेपालमा बनेको नयाँ सरकारसँग पारस्परिक लाभका आधारमा द्विपक्षीय सम्बन्ध सुदृढ गर्न चीनले चाहेको बताउनुभयो । चिनियाँ प्रधानमन्त्री ली खछ्याङ्ले नवनियुक्त नेपाली समकक्षी शेरबहादुर देउवालाई बधाई सन्देश पठाउँदै शुभकामना दिनुभएको छ । यसअघि चिनियाँ राजदूत यु होङ्ले प्रधानमन्त्री बनेलगत्तै देउवालाई भेटी शुभकामना र बधाई दिनुभएको थियो ।
पूर्ववर्ती दाहाल नेतृत्वको सरकारले चीनले अघि बढाएको बेल्ट एन्ड रोड अवधारणामा सहभागी हुने निर्णय गरेको थियो । देउवा नेतृत्वको सरकारले बेल्ट एन्ड रोड अवधारणामा नेपालको सक्रिय सहभागिताका लागि भौतिक पूर्वाधार निर्माणका परियोजना अघि बढाउँछ या बढाउँदै भन्ने आशंका चीनमा देखिएको बेइजिङस्थित नेपालीदूतावासका अधिकारी बताउँछन् ।
‘चिनियाँ नेतृत्वलाई देउवा नेतृत्वको सरकारले चीनसँगको सम्बन्धलाई प्राथमिकतामा राख्छ कि राख्दैन ? भारत र अमेरिकासँग निकट सम्बन्ध रहेका देउवाले कसरी चीनसँग सम्बन्ध अघि बढाउलान् ? भन्ने चासो व्यापक छ', दूतावासका एक अधिकारीले टेलिफोनमा अन्नपूर्णसँग भने ।
छिमेकसँग मित्रवत् व्यवहार : परराष्ट्रमन्त्री
काठमाडौं : नवनियुक्त उपप्रधानमन्त्री तथा परराष्ट्रमन्त्री कृष्णबहादुर महराले निकट छिमेकीसहित अन्य विदेशी राष्ट्रसँग मित्रवत् व्यवहार गर्ने नीति लिइने बताउनुभएको छ । परराष्ट्र मन्त्रालयमा बुधबार कार्यभार सम्हालेपछि कर्मचारलाई निर्देशन दिँदै मन्त्री महराले भन्नुभयो, ‘राष्ट्रिय स्वाधीनतालाई प्राथमिकता राख्दै छिमेकी र अन्य विदेशी राष्ट्रसँग मित्रवत व्यवहार गर्ने मेरो प्राथमिकता हुनेछ ।'
महराले अन्य मन्त्रालयबाट भएका कामले नेपालका राष्ट्रियतामा आँच पुगेको छ कि छैन भनेर पनि चनाखो भएर हेर्न कर्मचारीलाई निर्देशन दिनुभयो । ‘तपाईंहरूले आफूलाई होइन, देशलाई केन्द्रमा राखेर काम गर्नुहोस् । त्यही कामले तपाईंहरूको मूल्यांकन हुनेछ', महराले भन्नुभयो । महराले वैदेशिक रोजगारीमा जाने नेपालीको समस्या समाधानका लागि उच्चस्तरीय कार्यदल गठन गर्ने पहिलो निर्णय गर्नुभएको छ ।
वैदेशिक रोजगारीका चुनौती र सम्भावना केलाउँदै मन्त्रालयबाट गर्नुपर्ने तत्कालीन, मध्यकालीन र दीर्घकालीन प्राथमिकता निर्धारण गर्न परराष्ट्र मन्त्रालयको संयोजनमा गृह, अर्थ र श्रम तथा रोजगार मन्त्रालयका प्रतिनिधि रहेको कार्यदल गठन गर्नुभएको महराका सञ्चारविज्ञ त्रिभुवन पौडेलले जानकारी दिनुभयो ।
कार्यदलले वैदेशिक रोजगारीमा गएका नेपालीले तोकिएबमोजिमको रोजगारी र सुविधा नपाउने, अलपत्र पर्ने, कानुनी हैसियत गुमाउने, जेलमा पर्नुपर्ने, निधन हुने तथा उद्धारको प्रतीक्षामा बस्नुपर्नेजस्ता समस्या समाधान गर्नका लागि योजना बनाउनेछ । मन्त्रालयका सचिव शंकरदास बैरागीसहित मन्त्रालयका अधिकारीले उपप्रधानमन्त्री महरालाई मन्त्रालयमा स्वागत गर्नुभएको थियो ।
प्रतिक्रिया दिनुहोस !
