गाउँपालिका अध्यक्ष बन्न परराष्ट्रमन्त्रीका साथी गिरीद्वरा माओवादी परित्याग

काठमाडौं : आफ्ना साथी कृष्णबहादुर महरा ६ पटक मन्त्री हुँदा आफूले एकपटक गाउँपालिकाको अध्यक्ष हुन खोज्दा पनि नपाएपछि नेकपा माओवादी केन्द्रका केन्द्रीय सदस्य कुलानन्द गिरीले पार्टी परित्याग गर्नु भएको छ । उहाँले स्वतन्त्र रुपमा रोल्पाको त्रिवेणी गाउँपालिकामा उम्मेदवारी घोषणा गर्न पार्टी परित्याग गरेको बाउनुभयो ।

सो गाउँपालिका अध्यक्ष पदमा पार्टीका तर्फबाट गंगाराम घर्तीलाई उम्मेदवार बनाउने घोषणा गरेपछि गिरीले पार्टी परित्याग गरी स्वतन्त्र रुपमा उम्मेदवार बन्ने बताउनु भएको हो ।

गिरीले बिहीबार काठमाडौंमा पत्रकार सम्मेलन गरी माओवादी केन्द्र परित्याग गरेको घोषणा गर्नु भएको हो ।

राष्ट्रिय वुद्धिजिवी संगठनको केन्द्रीय उपाध्यक्ष समेत रहनु भएका गिरीले आफूलाई पार्टीले अन्याय गरेको बताउँदै आउनु भएको छ ।

त्रिवेणी गाउँपालिका वडा नं ५ निवासी गिरी जनजागृति उच्च माध्यमिक विद्यालयको प्राचार्य जिम्मेवारीमा रहेकै समयमा माओवादी विद्रोहमा सामेल हुनु भएको थियो ।

२०६० सालदेखि निरन्तर पार्टीले दिएको जिम्मेवारीमा रहनु भएका गिरी रोल्पामा रहेका माओवादीका सीमित बौद्धिक व्यक्ति मध्येमा पर्नु हुन्छ ।

महरा र गिरी रोल्पामा शिक्षक हुनुहुन्थ्यो ।