सैनिक १४ वर्षदेखि लगातार विजेता

भक्तपुर : विद्यालयस्तरीय फुबटलमा भक्तपुरको सल्लाघारीस्थित सैनिक आवासीय महाविद्यालयले एकछत्र राज गर्दै आएको छ ।

सैनिक विद्यालयस्तरीय फुटबलको च्याम्पियन नै हो । त्यसमाथि सैनिकले भक्तपुरमै प्रत्येक वर्ष गर्दै आएको अन्तरविद्यालय सैनिक रनिङ ट्रफी फुटबल प्रतियोगिताको समेत प्रत्येक वर्ष उपाधि जोगाउँदै आएको छ ।

यस वर्ष भएको प्रतियोगिताको १६ औं संस्करणको समेत विजेता हुँदै सैनिकले १४ वर्षे अविजित यात्रालाई निरन्तरता दिएको हो ।

प्रतियोगिताअन्तर्गत बिहीबार भएको फाइनलमा आयोजक सैनिकले जेम्स स्कुललाई ४–० गोलले हराएको हो । खेलको १७ औं मिनेटमा उत्तम शाहीले गोल गर्दै सैनिकलाई अग्रता दिलाएका थिए ।

त्यस्तै पहिलो हाफमै जेम्सका गोलकिपर सुसन शर्णले कर्नर प्रहार गरिएको बल क्लियर गर्न खोज्दा आफ्नै पोस्टभित्र छिर्दा जेम्स दुई गोलले पछि परेको थियो ।

दुई गोलले पछि परेका जेम्स खेलको दोस्रो हाफमा झन् दबाबमा प¥यो । अधिकांश समय बल जेम्सकै कोर्ट रहेको थियो । जसकारण जेम्सका गोलकिपर शर्ण धेरै दबाबमा परेका थिए । उनले सैनिकका खेलाडीहरुको धेरै प्रहारलाई निस्फल पनि बनाएका थिए ।

तैपनि दोस्रो हाफमा सैनिकले थप दुई गोल गरेरै छाड्यो । सैनिकका लागि उत्तम शाहीले दोस्रो गोल गरे भने आदित गुरुङले अर्को एक गोल थपे ।
फाइनलमा एक गोल थपेका गुरुङ प्रतियोगिताका सर्वाधिक गोलकर्ता खेलाडी बन्नसमेत सफल भए । उनले प्रतियोगिताभर १२ गोल गरेका थिए ।

त्यस्तै सैनिकका अनुमेष बानियाँ उत्कृष्ट मिडफिल्डर घोषित हुन सफल भए ।
उपविजेतामा सीमित रहेको जेम्सका पहिलो रोजाईमा गोलकिपर असिम शाह उत्कृष्ट गोलकिपर घोषित हुँदा जेम्सकै दीपेश नेपाली उत्कृष्ट रक्षक बने ।
विजेता सैनिकका प्रदीप श्रेष्ठ सर्वोत्कृष्ट खेलाडी बन्न सफल भए । डीएभी स्कुल अनुशासित टीमबाट पुरस्कृत भए ।

प्रतियोगिताको विजेता सैनिकले रनिङ शिल्डसँगै नगद २० हजार रुपैयाँ जोगाएको छ । विजेता खेलाडीहरुले एउटा खसीसमेत पुरस्कारको रुपमा पाए।

उपविजेता जेम्सले भने दस हजार रुपैयाँ नगद पुरस्कारमै चित्त बुझाउनुप्‍यो।
प्रतियोगिताका विजेता तथा उपविजेता स्कुल र खेलाडीहरुलाई नेपाली सेनाका कार्यरथी उपरथी शेखरसिंह बस्नेतले शिल्ड, पदक, प्रमाणपत्रसहित नगद पुरस्कार वितरण गरेका थिए ।

प्रतियोगितामा काभ्रेको एकसहित काठमाडौं उपत्यकाका १२ वटा विद्यालयको सहभागिता रहेको थियो । प्रतियोगिता लिगकम नकआउटको आधारमा खेलाइएको थियो ।