काठमाडौं : नेपाल वायु सेवा निगमलाई जहाज भाडाका दिन दुई एयरलाइन्स कम्पनीले रुचि देखाएका छन् । जहाज भाडाका लागि निगमले गरेको दोस्रोपटक गरेको टेन्डरमा भुटान एयर (तासी ग्रुप) र युक्रेनको स्टार एभिएनसले जहाज भाडामा दिन इच्छुक रहेको प्रस्ताव पेस गरेको निगमका महाप्रबन्धक सुगतरत्न कंसाकारले जानकारी दिनुभयो ।
निगमले ४५ दिनदेखि दुई महिनासम्मको अवधिका लागि मात्रै जहाज भाडाका मागेको थियो । जहाज भाडामा दिन तयार रहेका दुई कम्पनीको मूल्यांकन तत्काल सुरु हुने र कम्पनी छनोट गरिने उहाँले जानकारी दिनुभयो ।
यसअघि निगमले वैशाख २५ गतेको सिमा राखेर गरेको पहिलो टेन्डरमा भने कुनै पनि कम्पनीले प्रस्ताव पेस गरेनन् । निगमले सुरुमा एयरबसको ३२० सिरिज जहाज भाडाका खोज्दै टेन्डर गरे पनि कसैले चासो नदेखाएपछि भने ३१९, ३२० वा ३ सय २१ जुनसुकै भए पनि हुने भन्दै टेन्डर गरेको थियो । तर जहाज १५ वर्षभन्दा पुरानो भने हुन नहुने सर्त टेन्डरमा उल्लेख थियो ।
निगमले अन्तर्राष्ट्रिय उडान भर्दै आएको पुरानो एउटा बोइङ लिलामी प्रक्रिया र अर्को मर्मत गर्नुपर्ने समय आएको भन्दै जहाज भाडाका माग गरेको थियो । जहाज भाडाका लिएर निगमले क्वालालाम्पुर, दोहा, दिल्ली, बैंगलोर जस्ता गन्तव्यमा उडाउने गर्ने योजना बनाइसकेको छ । निगमसँग अन्तर्राष्ट्रिय उडानका लागि अहिले दुईवटा न्यारो बढी विमान र एउटा बोइङ मात्रै छन् ।
प्रतिक्रिया दिनुहोस !
