आर्मी र पुलिस संयुक्त विजेता

काठमाडौं : फाइनल खेलमा वर्षाले बाधक बनेपछि प्रथम प्रधानमन्त्री कप राष्ट्रिय क्रिकेट प्रतियोगितामा विभागीय टोलीद्वय त्रिभुवन आर्मी क्लब र नेपाल पुलिस क्लबलाई संयुक्त विजेता घोषित गरिएको छ । उपाधिसँगै आर्मी र पुलिसले समान १५÷१५ लाख पुरस्कार पाए । घरेलु क्रिकेटमा आर्मी र पुलिस पहिलो पटक आमने सामने भएका हुन् ।

किर्तिपुर स्थित टियु क्रिकेट मैदानमा टस हारेर पहिले ब्याटिङको निम्तो पाएको पुलिसले ४५.१ ओभरमा सबै विकेट गुमाउनु अघि एक सय २६ रन बनाएको थियो । जवाफी ब्याटिङ सुरु गरेको आर्मीले २.३ ओभरमा एक विकेट गुमाउदै सात रन बनाउदा भारी बर्षा भएपछि खेल रोकिएको थियो । खेलको अन्त्यतिर बर्षा रोकीदा केही समय खेल्न मिल्ने भएपनि दुवै टोलीका कप्तानले नखेल्ने निर्णय गरेपछि दुवै टोलीलाई बिजेता घोषित गरीएको थियो ।

त्यसअघि पुलिसले तुलनात्मक रुपमा कमजोर ब्याटिङ प्रदर्शन गरेको थियो । पुलिसका लागि सुरुवाती ब्याट्सम्यान सुनिल धमलाले जोडेको ३२ रननै टोलीको ब्यक्तिगत सर्बाधिक योगफल बन्यो । ९० बल खेलेका उनले एक छक्का तथा दुई चौका प्रहार गरेका थिए । यस्तै सिद्धान्त लोहनीले २०, दीपेन्द्र सिंह ऐरीले १९, कुशल भुर्तेलले १५ तथा सुशिल कँडेलले १२ रन जोड्नु बाहेक अन्यले दोहोरो रन जोड्न सकेनन् ।

त्यसअघि जितेन्द्र मुखीयाले चार विकेट तथा सुसन भारीले तीन विकेट लिएपछि पुलिसको पाली धर्मराएको थियो । ८.१ ओभर बलिङ गरेका जितेन्द्रले दुई मेडन निकाल्दै २८ रन खर्चिएका थिए । नौ ओभर बलिङ गरेका सुसनले चार मेडनसहित १९ रन मात्रै दिएका थिए । त्यस बाहेक सागर पुनले दुई विकेट तथा सोमपाल कामीले एक विकेट लिएका थिए । बर्षाले खेल रोकीनु अघि आर्मीका लागि सुरुवाती ब्याट्सम्यान महेश क्षेत्री चार रन बनाउदै ललित भन्डारीको बलमा आउट भएका थिए । अनिल कुमार मन्डल शुन्य रनमै अबिजित रहे।

यसैगरी प्रतियोगितामा आर्मीका अलराउन्डर सागर पुन प्रतियोगिताको सर्बोत्कृष्ट खेलाडी घोषित भएका छन् । उनले एक लाख रुपैयाँ पुरस्कार पाए । पश्चिमाञ्चलका सौरभ खनाल उत्कृष्ट ब्याट्सम्यान तथा आर्मीका सुसन भारी उत्कृष्ट बलर घोषित भए । उत्कृष्ट ब्याट्सम्यान र बलर दुबैले ५०÷५० हजार रुपैयाँ प्राप्त गरे । पश्चिमाञ्चलका बिपिन खत्री उदीयमान खेलाडी घोषित भए । उनले २५ हजार रुपैयाँ हात पारे ।