लन्डन : बेलायतीहरूले बिहीबारको आम चुनावमा देशभरका ४० हजार मतदान केन्द्रमा मतदान गरिरहेका छन् । ४ करोड ६९ लाख बेलायतीले ६ सय ५० जना सांसद निर्वाचित गर्न मतदान गर्दैछन् ।
प्रधानमन्त्री टेरेसा मेले पति फिलिपसँगै बर्कसायरमा पर्ने सोनिङमा मतदान गर्नुभयो । विपक्षी दल लेबरका नेता जेरेमी कोर्बिनले राजधानी लन्डनको उत्तरी भूभागको इस्लिङटनस्थित पेकम्यान विद्यालयमा मतदान गर्नुभयो । मतदान बेलायती समयअनुसार बिहीबार बिहान ७ बजेदेखि राति १० बजेसम्म हुनेछ भने मतदान सकिनासाथ मतगणना सुरु हुनेछ । अधिकांश मतदान केन्द्र विद्यालय र सामुदायिक भवनमा राखिएको छ ।
कैयौं बेलायती यसअघि नै हुलाकबाट मतदान गरिसकेका छन् । यसअघि सन् २०१५ मा भएको निर्वाचनमा ४ करोड ६४ लाख मतदाता थिए भने यसपल्ट करिब ५ लाख मतदाता थपिएका छन् । सन् २०१५ को चुनावमा कुल मतदातामध्ये ६६.४ प्रतिशतले मात्र मतदान गरेका थिए भने कन्जरभेटिभ पार्टीले संसदका ६ सय ५० मध्ये ३ सय ३१ सिट जितेको थियो ।
हालै राजधानी लन्डनमा भएका आतंकवादी आक्रमणपछि भइरहेको चुनावमा कडा सुरक्षा गरिएको छ भने सुरक्षाकर्मीले गस्ती पनि गरिरहेका छन् ।
यसपालीको चुनाव संसदको लागि मात्र भएकाले मतगणनाको नतिजा छिट्टै आउन सक्ने निर्वाचन अधिकारीले बताएका छन् । बिहीबार मध्यरातसम्ममा नै केही क्षेत्रको निर्वाचन परिणाम आइसक्ने अनुमान गरिएको छ । मतगणनाको अन्तिम परिणाम ढिलोमा शुक्रबार दिउँसोसम्म सार्वजनिक भइसक्ने अनुमान छ ।
बेलायतको तल्लो संसद हाउस अफ कमन्सका कुल ६ सय ५० सिटमध्ये सत्तारुढ दल कन्जरभेटिभ पार्टी वा विपक्षी दल लेबर पार्टीले बहुमत ल्याउन ३ सय २६ सिट जित्नुपर्नेछ ।
प्रधानमन्त्री मेको सत्तारुढ दल कन्जरभेटिभ पार्टीले बहुमत जित्ने अनुमान छ । तर पछिल्लो समय विपक्षी नेता जेरेमी कोर्बिनका पक्षमा पनि ठूलो जनमत देखिएको थियो । लन्डनमा भैरहेका आतंकवादी हमलायता सुरक्षा चुस्त राख्न नसकेको भन्दै प्रधानमन्त्री मेको आलोचना भएपछि उहाँको लोकप्रियता पछिल्लो समय खस्केको छ ।बिबिसी/रासस
प्रतिक्रिया दिनुहोस !
