मिस नेपाल निकिता भन्छिन्, ' ढिलो चाँडो अभिनयमा लाग्छु'
गत शुक्रबार एकाबिहानै उठिन् निकिता चाण्डक । उठ्दा उनको मन शान्त र स्थिर थियो । ‘मनमा न कुनै कौतुहल थियो, न डर नै', निकिताले भनिन्, ‘ममा कुनै इमोसन थिएन ।' एक साताअघि मिस नेपाल विजेता घोषणा हुने दिनको आफ्नो अवस्थाबारे निकिताले बताइन् । ‘त्यसभन्दा अघि मन तलमाथि भइरहन्थ्यो', उनले भनिन्, ‘के होला, कस्तो होला, जात कस्को पोल्टामा जाला ? भन्न पीरले सताउँथ्यो ।'
तर अन्तिम प्रतिस्पर्धाको दिनभने उनको मन एकाएक स्थिर भयो । न डर रह्यो, न उत्साह, न त अपेक्षा नै । सन् १९९६ सालमा आमा सुष्मा चाण्डक र बुवा अनिलको कोखबाट कान्छी छोरीका रूपमा जन्मिएकी निकिताकी दिदी नेहा यो यात्राकी ऊर्जा हुन् । भाइ सञ्जुले जहिले पनि उनलाई थप ऊर्जा दिएको उनी सम्झन चाहन्छिन् । यो यात्रामा आउन उनको पारिवारिक र सामाजिक परिवेश त्यति सहज थिएन । मारवाडी समुदायमा हुर्किएकी छोरीचेली ग्ल्यामर क्षेत्रमा आउन सहज छैन ।
बीकम गरेर बुवाको बिजनेसमा सघाइरहेकी निकिताकी दिदी नेहाले अभिभावक र आफन्तलाई सम्झाइन् । सहमत गराइन् । यतिबेला नोयडाको एमआईटी युनिभर्सिटीबाट बीकम गरिरहेकी निकिताले करिब दुई वर्षअघि बैंगलोरमा पढ्दा र्याम्प नापेकी थिइन् । पारिवारिक र सामाजिक वातावरण नभए पनि उनको मनमा भने ग्ल्यामरस क्षेत्रप्रति गहिरो रुचि थियो ।
त्यही रुचि र चाहना पूरा गर्न दिदीले पारिवारिक वातावरण तयार पारिदिएपछि उनी मध्य मार्चमा राजधानी आइन् । आयोजक संस्था द हिडेन ट्रेजरले गरेको पूर्वअडिसनबाट उनी छानिइन् । हरेक प्रतिस्पर्धाका लागि उनले आफूलाई तयार पारिन् ।
अन्तिम प्रतिस्पर्धाको दिन सामान्य दिनमा जस्तै नियमित नित्यकर्म गरिन् । स्टेज उक्लिन् । निर्णायकले सोधेको प्रश्नमा सहज प्रस्तुतिका साथ सहभागी भइन् । अन्ततः ताज उनको पोल्टामा पर्यो । ‘न खुसीको आँसु निस्क्यो, न त धेरै उत्साहित भएँ', मिस नेपाल २०१७ निकिताले अनुभव सुनाइन्, ‘म त्यसदिन बिहानैदेखि जे हुन्छ ठीकै छ भन्ने मुडमा थिएँ ।' उनले त्यस्तो मनस्थिति बनाएकी भने होइनन्, स्वतः यस्तो मुड बनेको थियो ।
ताजसँगै हात परेको पुरस्कारको आधा राशि उनले माइती नेपाललाई डोनेसन गर्ने योजना बनाएकी छन् । अब उनी एक वर्ष द हिडन ट्रेजरको मातहतमा रहेर काम गर्ने छिन् । अहिले उनको प्राथमिकता मिस वर्ल्ड २०१७ रहेको छ । ‘विश्वास छ, सातौं स्थानमा उक्लिएको नेपालको नाम म एक नम्बरमा ल्याउन सक्छु', निकिताले विश्वास देखाइन् ।
उम्दा उमेरकी निकिताको उद्देश्य पनि कलाकारिता गर्ने रहेको छ । उनले भनिन्, ‘म ढिलो चाँडो अभिनयमा लाग्छु ।' आम किशोरकिशोरी र युवा पुस्तालाई उनी धूमपान र मद्यपान नगर्न आग्रह गर्छिन् । आगामी दिनमा यसलाई अभियानका रूपमा चलाउने सोच बनाएकी उनी धूमपान र मद्यपानले एक जीवन होइन परिवार र समाज नै समस्या परेको अनुभूति गरेकी छन् ।
मानिसमा प्रतिभा छ भने कहीँ न कहीँ उजागर हुने विश्वास लिएकी निकिता भन्छिन्, ‘मान्छेको प्रतिभा जात, धर्म, भूगोल र भाषाले निर्धारण गर्दैन । यो उसको अन्तरनिहित प्रतिभाले उजागर गर्ने हो । आफू मिस नेपाल भएपनि एकाध स्वरहरू ‘इन्डियन' भन्ने सुनेको भए पनि त्यो आयोजकले प्रतिस्पर्धामा तोक्ने सीमाको ज्ञान नभएकाहरूको भनाइ रहेको उनी ठान्छिन् । ‘सहभागी गराउँदा नै फर्म भराइन्छ, नागरिकता मागिन्छ', उनले भनिन्, ‘त्यो नबुझेर भनिएको कुरामा मलाई कतै गुनासो छैन ।' आफ्नो जितमा हिमालदेखि तरार्इं र पूर्वदेखि पश्चिमबाट शुभेच्छा, बधाई र आगामी यात्राको शुभकामना आइरहेकाले यो जित नेपाली छोरीको जितका रूपमा लिइएको उनले महसुस गरेकी छन् ।
प्रतिक्रिया दिनुहोस !
