मेरो सफलताको पछाडि कोही छैन : प्रियंका

बलिउडमा अहिले चल्तीकी नायिका हुन्, प्रियंका चोपडा । उनको अभिनय यात्रा बलिउडबाट हलिउडसम्म पुगिसकेको छ । उनी अभिनीत पहिलो हलिउड चलचित्र 'वे वाच' दर्शकमाझ आइसकेको छ । चलचित्रबाट उनले राम्रै प्रतिक्रिया पाएकी छन् । १७ वर्षको कलिलो उमेरमा मिस वल्र्डको ताज चुमेकी प्रियंका सम्भवतः त्यति सानै उमेरमा विश्वविख्यात बन्न सफल हुने थोरै सेलिब्रेटीमा पर्छिन् । तर उनै प्रियंकाले चाहे जस्तो व्यावसायिक सफलता नपाएको झोंकमा एक पटक आत्महत्याको प्रयास गरेकी थिइन् ।

प्रियंकाले सन् २००३ देखी बलिउडमा करिअर सुरु गरेकी हुन् । मेहनत बिना केही सम्भव छैन भन्ने उनले साबित गरेकी छन् । कडा मेहनतकै कारण 'ग्लोबन आइकन' बन्न सफल भएकी छन् । यसको श्रेय उनी आफैंलाई दिन्छिन् । 'मेरो सफलताको पछाडि कोही छैन, मेरै मेहनतले सम्भव भएको हो', उनले भनेकी छन्, 'हात्ती लम्किँदै गर्छ, कुकुर भुक्दै गर्छ । गन्तव्यमा पुग्न लगातार मेहनत गरिरहनुपर्छ ।'

बलिउडदेखी हलिउडसम्म नाम कमाउन सजिलो थिएन तर उनले सम्भव बनाइन् । विश्वव्यापी रुपमा ख्याति कमाएकी उनले प्रत्येक अवसरलाई स्वीकार गरेको र आफैंमा विश्वास गरेर अघि बढेको बताएकी छन् । आफ्नो अगाडि आएका अवसरलाई आत्मादेखि स्वीकार गरेमा सफलता कमाइने उनको भनाई छ । अमेरिकी टीभी सिरिज 'क्वान्टिको'मा काम गरेपछि आफुले परम्परागत सोच त्यागेको बताएकी छन् । यही अमेरिकन टीभी सोबाट उनले विश्वव्यापी रूपमा ख्याती कमाएकी हुन् ।

आफू भारतीय परम्परागत सोचबाट बाहिर आउन चाहेको र बलिउडले यस्तो सोच त्याग्नुपर्ने तकै समेत गरेकी छन् । उनी युवाहरूले संसारको जुनै पनि कुनामा गएर आफुहरूले चाहेबमोजिम काम गर्न पाएमात्रै उनीहरू सशक्त हुन्छन् भन्ने विचार राख्छिन् । 'यो गर त्यो नगर भन्नु राम्रो हैन', प्रियंकाले भनेकी छन् ।

एक वेभसाइटले गरेको अध्ययनअनुसार प्रियंका सन् २०१७ को सर्वाधिक सुन्दर महिलामा दोस्रो नम्बरमा पर्न सफल भएकी छन् । ३४ वर्षीया अविवाहित प्रियंकाले अमेरिकी टीभी सो 'क्वान्टिको'को लोकप्रियतापछि अन्तर्राष्ट्रिय सम्मानस्वरूप पिपुल च्वाइस अवार्ड समेत हात पारिसकेकी छन् । सानो छँदा उनी इन्जिनियर बन्न चाहन्थिन् । त्यसपछि क्रिमिनल साइकोलोजिस्ट बन्ने प्रयास गरिन् । तर त्यो चाहना अभिनयमा लागेपछि समाप्त भयो ।

प्रियंकाले सिक्किमेली नेपाली चलचित्र 'पाउ' (पाहुना) बनाउने घोषणा गरेकी छन् । आसाम बोर्डको राजदूतमा चयन भएपछि सिक्किमेली नेपाली चलचित्र बनाउन उनले चासो देखाएकी हुन् । बलिउडमा अभिनयका साथै गायनमा समेत आफुलाई खरो रुपमा उतारेकी उनी जनसम्पर्कमा एकदमै सिपालु मानिन्छिन् ।