रियल, रोनाल्डो र जिदान

क्लब फुटबलमा रियल म्याड्रिडले हात पारेको सफलता दुनियाँ चकित पार्ने खालको छ । अझ रियलले सन् २०१४ यता प्राप्त गरेका उपलब्धि जोकसैलाई पनि सहज लाग्दैन । यो सफलता फेरि प्राप्त गर्न न कसैका लागि सजिलो नै छ । रियलले पछिल्लो समय आफूलाई वास्तबमै 'रियल' भएको प्रमाणित गरेको छ । रियल म्याड्रिडका लागि जित ठूलो कुरा होइन । पछिल्लो समय विश्वभरका फुटबलप्रेमी ठान्छन्- रियल उभिएको ठाउँमा अरू सबै फिक्का हुन् र रियलले चाह्यो भने जुनसुकै खेल जित्छ । पछिल्ला घटनाक्रम पनि यस्तै देखिएको छ । तर, रियलले जित्नका लागि कुनै पनि चुनौतीको सामना गर्नु पर्दैन भन्नुचाहिँ गलत हुनेछ ।

अघिल्लो साता च्याम्पियन्स लिग फुटबलको फाइनल प्रारम्भमा युभेन्ट्सले सनसनीपूर्ण प्रदर्शन गर्‍यो । पहिलो हाफको सुरुआतमा अग्रता लिएको रियलले केही समयमै आफ्नो अग्रता गुमायो । तर, दोस्रो हाफमा रियलको सर्वोच्चता हल्लिएन । दोस्रो हाफमा मात्रै रियलले तीन गोल गर्‍यो जहाँ रियलको प्रभुत्व स्पष्ट देखिन्थ्यो । रियलसामु निरीह देखिएको युभेन्ट्सका रक्षापंक्ति अन्ततः फिक्का साबित भए ।

७५ हजार दर्शक क्षमता भएको कार्डिफस्थित मिलेनियम स्टेडियममा रियल म्याड्रिडले आफूलाई क्लब फुटबलको राजा भएको प्रमाणित गर्‍यो, युरोपियन च्याम्पियन्स लिग फुटबको उपाधि जितेर । फाइनलमा रियलले बलियो इटालियन प्रतिद्वन्द्वी युभेन्ट्सलाई ४—१ गोलले हराउँदै लगातार दोस्रोपटक च्याम्पियन बनेको थियो । फाइनलमा युभेन्ट्सलाई हराउँदा रियलका सुपरस्टार रोनाल्डोले दुई, कासिमिरो र मार्को एसेनसियोले एक एक गोल गरेका थिए ।

रियलले च्याम्पियन्स लिगको उपाधि जोगाउने एकमात्र क्लबको इतिहाससमेत रच्यो । यतिमात्र होइन, रियल सबैभन्दा बढी च्याम्पियन्स लिगको उपाधि जित्ने क्लब हो । रियलले हालसम्म १२ पटक च्याम्पियन्स लिगको उपाधि जितेको छ । रियलको यस उपलब्धिमा कार्डिफका दर्शक मात्र होइन विश्वभरका करोडौं फुटबलप्रेमी साक्षी बने । सबैको एउटै खुल्दुली रह्यो- आखिर रियलमा यस्तो जादु के छ ?

क्रिस्टियानो रोनाल्डो

रियलको यस सफलताको पछाडि खेलाडी, व्यवस्थापक र पदाधिकारीको लगाव यथार्थ सर्त हो । तर, रियललाई वास्तविक रियल बनाउने नायकमा अहिले क्रिस्टियानो रोनाल्डो र प्रशिक्षक जिनेदिन जिदानको चर्चा चुलिँदो छ । विश्वभरका फुटबलप्रेमी ठान्छन्- रियल उर्वर भूमि हो जहाँ रोनाल्डो र जिदान उन्तत खेती गरिरहेका छन् ।

रियल म्याड्रिडले हालसम्म १२ पटक च्याम्पियन्स लिगको उपाधि जितेको छ । रियलको यस उपलब्धिमा कार्डिफका दर्शकमात्र होइन, विश्वभरका करोडौं फुटबलप्रेमीको एउटै खुलदुली रह्यो- आखिर रियलमा यस्तो जादु के छ ?

पछिल्लो चार सिजनमा मात्रै रियलले जितेको यो तेस्रो च्याम्पियन्स लिग उपाधि हो । रियलले यो सिजन स्पेनिस ला लिगाको उपाधि पनि जितेको थियो । यसपटकको च्याम्पियन्स लिग रोनाल्डोका लागि विशेष रह्यो । उनी तीनवटा च्याम्पियन्स लिगको फाइनलमा गोल गर्दै आफ्नो टोलीलाई उपाधि दिलाउने विश्वकै एकमात्र खेलाडी बने । उनले यसअघि सन् २००८ र सन् २०१४ को च्याम्पियन्स लिगको फाइनलमा पनि गोल गरेका थिए ।
सन् २००८ मा इङ्लिस क्लब म्यानचेस्टर युनाइटेडले उपाधि जित्दा रोनाल्डो टोलीका महत्वपूर्ण सदस्य थिए ।

३२ वर्षीय रोनाल्डोले रियलको तर्फबाट तेस्रो र समग्रमा चौथोपटक च्याम्पियन्स लिग उपाधि विजेता हुन् । उनी च्याम्पियन्स लिगमा सर्वाधिक गोल गर्ने खेलाडीसमेत बनेका छन् । च्याम्पियन्स लिगमा उनले हालसम्म एक सय ४० खेल खेल्दै कीर्तिमानी एक सय पाँच गोल गरेका छन् । उनले यो सिजनको पछिल्ला १३ खेलमा मात्रै १२ गोल हाने । रोनाल्डोकै प्रेरणाले रियलले यो सिजन क्लब विश्वकपको उपाधि समेत जित्यो । च्याम्पियन्स लिग फुटबको फाइनल खेलका म्यान अफ दी म्याच बनेका रोनाल्डोले आफ्नो खेल जीवनमा ६ सय गोलको कोशेढुंगा पनि पूरा गरे । उनले क्लब र राष्ट्रिय टोलीबाट ६ सय पूरा गरेका हुन् ।

च्याम्पियन्स लिगको उपाधि जितेपछि रेनाल्डोले आफू अझै युवा भएको प्रतिक्रिया दिएका छन्, 'म आफूलाई एक जवान केटो महसुस गर्छु । उमेर भनेको नम्बरमात्र रहेछ । हामीले यस सिजन ला लिगा र च्याम्पियन्स लिगको डबल टाइटल जित्यौं । युभेन्ट्सजस्तो टोलीसँग च्याम्पियन्स लिग जित्नु सहज पक्कै थिएन जसले फाइनलसम्म आउँदा तीन गोलमात्र खाएको थियो', रोनाल्डोले भने । पोर्चुगल राष्ट्रिय टोलीका नायक रोनाल्डोले पोर्चुगललाई युरो कपको उपाधि चुमाएर गत वर्ष नै वाहवाही पाएका थिए ।

जिनेदिन जिदान

रियलको यस उपलब्धिमा प्रशिक्षक जिनेदिन जिदानको भूमिका झनै उच्च कोटीको छ । च्याम्पियन्स लिग उपाधिले जिदानलाई सफल प्रशिक्षकको श्रेणीमा उभ्याएको छ । रियलको प्रमुख प्रशिक्षकको जिम्मेवारी सम्हालेको १८ महिनामा जिदानले क्लबलाई पाँचवटा महत्वपूर्ण उपाधि दिलाए । फ्रान्सेली राष्ट्रिय टोलीका पूर्वखेलाडी जिदान रियल म्याड्रिडका पनि पूर्वखेलाडी हुन् ।

जिदानले क्लबलाई दिलाएको यो दोस्रो च्याम्पियन्स लिग उपाधि हो । यसैगरी उनले रियल म्याड्रिडलाई स्पेनिस ला लिगा, क्लब विश्वकप र युरोपियन सुपर कपको उपाधि पनि दिलाएका छन् । उनी कुनै पनि क्लबलाई लगातार दुईपटक 'च्याम्पियन्स लिग'को उपाधि दिलाउने विश्वकै एकमात्र प्रशिक्षकसमेत बनेका छन् । जिदानले अहिलेको रियलमा एउटा प्रवृत्ति भित्याएका छन्- अन्तिम समयसम्म हार नखाने र जसरी पनि जितेरै छाड्ने ।

च्याम्पियन्स लिगका सफल प्रशिक्षक जिदान पछिल्लो उपलब्धिबाट झनै उत्साहित बनेका छन् । 'क्लबको उपलब्धिबाट म निकै खुसी छु तर यो सुरुआत मात्र हो । हामीले अझ धेरै गर्न बाँकी छ', उपाधि जितेपछि ४४ वर्षीय जिदानले भने । खेलाडीका रूपमा जिदानले दुईपटक युभेन्ट्सको तर्फबाट च्याम्पियन्स लिगको फाइनल खेलेका थिए तर दुवैपटक उनको टोली फाइनलमा पराजित भएको थियो । सन् २००२ मा पहिलोपटक उनले रियल म्याड्रिडका तर्फबाट च्याम्पियन्स लिगको उपाधि जितेका थिए । त्यति बेला उनी सम्मिलित रियल म्याड्रिडले फाइनलमा जर्मन क्लब बायर लेभरकुसेनलाई २-१ गोलले हराएको थियो ।

रियल म्याड्रिडले सन् २०१४ मा च्याम्पियन्स लिगको फाइनल जित्दा उनी टोलीका तत्कालीन प्रशिक्षक कार्लो एन्सेलोट्टीका सहायक थिए । उनले सन् २०१६ मा राफा बेनिटेजको स्थानमा रियल म्याड्रिडको प्रशिक्षकको जिम्मेवारी पाएका हुन् । जिदानले सुरुमा रियलकै 'बी' टिममा दुई वर्ष प्रशिक्षण गरेका थिए । रियल म्याड्रिडमा उनको सम्झौता अब एक वर्षमात्र बाँकी छ । तर, क्लबले जिदानको सम्झौता नवीकरण गर्ने संकेत दिइसकेको छ । वास्तवमा रियललाई उनीजत्तिको प्रशिक्षक पाउन कठिन हुनेछ । उनै रोनाल्डो र जिदान प्रेरित रियलले अब आगामी अगस्ट ८ मा म्यानचेस्टर युनाइटेडसँग यूईएफए सुपर कपको फाइनल खेल खेल्नेछ ।
-एजेन्सीको सहयोगमा