सत्ता दौडमा व्यवसायी

नेपालगन्ज : नेपालगन्जको उखरमाउलो गर्मीसँगै यहाँ चुनावी सरगर्मी पनि उत्तिकै बढ्न थालेको छ । घोषणा भइसकेका उम्मेदवार धमाधम घरदैलोमा दौडिरहेका छन् । कांग्रेसले पनि शनिबार बाँकेका सबै स्थानीय तहका लागि उम्मेदवारीको टुंगो लगाएको छ । निकै विवादका बीच लामो छलफलपछि कांग्रेसले शनिबार बाँकेका लागि उम्मेदवारी टुंग्याएको हो । केही नेता कार्यकर्ताले असन्तुष्टि जनाउँदै धर्नामा बसेपछि कांग्रेसले आधिकारिक घोषणा भने गर्न सकेको छैन । कांग्रेसका बाँके जिल्ला सभापति किरण कोइरालाका अनुसार पार्टीले नेपालगन्ज उपमहानगरपालिकाको प्रमुखमा डा. सुरेस कनोडिया र उपप्रमुखमा उमा थापामगरलाई उम्मेदवार बनाएको छ । थापा नेपालगन्जकी सक्रिय महिला पत्रकार हुनुहुन्छ ।

कांग्रेसले कोहलपुर नगरपालिकाको प्रमुखमा भानुभक्त भट्टराई र उपप्रमुखमा सन्जु चौधरीलाई उम्मेदवार बनाएको छ । यसैगरी ६ वटै गाउँपालिकाको उम्मेदवार पनि टुंगो लागेको छ । खजुरा गाउँपालिकाको अध्यक्षमा नक्कि खाँ, उपाध्यक्षमा दीपा आले, वैजनाथ गाउँपालिकाको अध्यक्षमा देवबहादुर खत्री र उपाध्यक्षमा भावना चौधरी, राप्तीसोनारी गाउँपालिकाको अध्यक्षमा लाहुराम थारु र उपाध्यक्षमा धनीकुमारी खत्रीलाई कांग्रेसले उम्मेदवार बनाएको छ । यसैगरी जानकी गाउँपालिकाको अध्यक्षमा छब्बन खाँ र उपाध्यक्षमा रामप्यारी यादव, नरैनापुर गाउँपालिको अध्यक्षमा रामचन्द्र मौर्य र उपमेयरमा अतिकुन्नीसालाई उम्मेदवार बनाइएको छ ।

अब असार १४ को स्थानीय तहको निर्वाचनमा बाँकेको नेपालगन्जमा भिड्ने सबैजसो पार्टीका मेयर उम्मेदवार यहाँका नाम चलेका व्यवसायीहरूले पाएका छन् । अहिले व्यवसाय परिवार र कर्मचारीको जिम्मा लगाएर सबै जना उम्मेदवार राजनीतिमा होमिएका छन् । घरदैलो, पार्टीका सभा, भेला अनि नेताकार्यकर्ता भेटघाटमा उनीहरू व्यस्त छन् ।

कांग्रेसबाट टिकट पाएका एकजना व्यवसायी हुनुहुन्छ डा. कनोडिया । उहाँ नेपालगन्ज मेडिकल कार्यकारी निर्देशक हुनुहुन्छ । कलेजले कोहलपुर र नेपालगन्जमा ठूला शिक्षण अस्पताल सञ्चालन गर्दै आएको छ । कनोडिया भन्नुहुन्छ, 'राजनीतिमा रुची त पहिलादेखि नै हो अब म पूर्णरुपले राजनीतिमा होमिन्छु भनेर मेयरको लागि तयारी गरेको छु ।' मेयरका लागि कांग्रेसबाट टिकट पाइसकेपछि अब उहाँले कलेजमा सीईओ राखेर आफूले बिदा लिने र राजनीतिमै लाग्ने बताउनुभएको छ । अहिले कांग्रेस बाँकेको सल्लाहकारसमेत रहेका कनोडिया भन्नुहुन्छ, 'प्रजातन्त्रका लागि सुरुदेखि नै लड्दै आएको मान्छे हुँ तर पूर्णकालीन राजनीतिमा लागिनँ । अब प्रयत्न गर्दैछु ।'

एमालेबाट टिकट पाएका समसुद्दिन सिद्दिकी भने पहिलादेखि नै राजनीतिमै समर्पित व्यक्ति हुनुहुन्छ । २०५६ सालमा उहाँ नेपालगन्ज नगरपालिकाको उपमेयरमा निर्वाचित हुनुभएको थियो । त्यसबेला एमालेबाट टिकट पाएर नेपालगन्जको मेयर जित्नुभएको धवलसमशेर राणासँग सिद्दिकी प्रतिस्पर्धा गर्दै हुनुहुन्छ । कुनै बेला एउटै पार्टीबाट लडेर मेयर र उपमेयर दुवैमा जित हात पारेका दुवैजना अहिले दुई विरोधी दलबाट मेयरका लागि प्रतिस्पर्धा गर्दै हुनुहुन्छ ।

राणा अहिले राप्रपाको महामन्त्री हुनुहुन्छ । मुस्लिम बाहुल्यता रहेको नेपालगन्ज क्षेत्रमा सिद्दिकीको उम्मेदवारीलाई बलियो मानिएको छ । सिद्दिकी भारोत्तोलनका अन्तर्राष्ट्रियस्तरका खेलाडीसमेत हुनुहुन्छ । माओवादी केन्द्रले नेपालगन्जमा मेयरका लागि दामोदर आचार्यलाई अघि सारेको छ । पार्टीले उम्मेदवारी घोषणा गरिदिएपछि उनको व्यस्तता अझै बढेको छ । यसअघि पनि व्यवसाय सँगसँगै पार्टीका धेरैजसो कार्यक्रममा उहाँ सहभागी हुनुहुन्थ्यो । आफूले सञ्चालन गर्दै आएको गार्मेन्ट उद्योग र रेडिमेड कपडाको होलसेल व्यापार अहिले परिवार र कर्मचारीको भरमा चलिरहेको छ । उहाँ भने पूर्णरुपमा राजनीतिमै लाग्नुभएको छ ।

२०३७ सालदेखि नै कम्युनिस्ट राजनीतिमा होमिएका उहाँ यसअघि नेकपा एकता केन्द्रमा हुनुहुन्थ्यो । पार्टी एकतापछि उहाँ माओवादी केन्द्रका नेता हुनुभयो । यसअघि उहाँले नेपालगन्ज उद्योग वाणिज्य संघको अध्यक्षको जिम्मेवारी पनि सम्हालि सक्नुभएको छ । त्यस्तै उहाँ नेपाल उद्योग वाणिज्य महासंघका केन्द्रीय सदस्य पनि भइसक्नु भएको छ । अहिले माओवादी केन्द्रको केन्द्रीय सदस्य आचार्य २०७० सालको संविधानसभाको निर्वाचनमा तत्कालिन कांग्रेस सभापति सुशील कोइरालासँग प्रतिस्पर्धा गर्नुभएको थियो । 'व्यापार व्यवसाय भनेको परिवार र छोराछोरीले व्यवस्थापन गर्ने हो', आचार्य भन्नुहुन्छ, 'म त सुरुदेखि नै राजनीति गरेको मान्छे, सँगसँगै मैले व्यापार व्यवसाय पनि अघि बढाएँ ।'

त्यस्तै कमल थापा नेतृत्वको रापप्राले पार्टीकै महामन्त्री धवलसमशेर राणालाई मेयरको उम्मेदवार बनाएको छ । उहाँको पनि नेपालगन्जमा होटेल व्यवसाय छ । कुनै जमानामा नेपालगन्जमा निकै चर्चित होटेल बाटिकामा उहाँको लगानी छ । यो होटल अहिले पनि उत्तिकै चलिरहेको छ । त्यस्तै बोर्डिङ स्कुलमा पनि उनको लगानी छ । सुरुवातदेखि नै राजनीति र व्यवसायलाई सँगसँगै अघि बढाइरहेका राणा यसअघि एमालेबाट २०५६ सालमा नेपालगन्जको मेयर हुनुभएको थियो ।