कांग्रेसका मेयर उम्मेदवार आफ्नो गाडी तोडफोड गर्नेलाई छुटाउन प्रहरी कार्यालयमा

नेपालगन्ज : नेपाली कांग्रेसका नेपालगन्ज उपमहानगरपालिकाका मेयरका उम्मेदवार सुरेस कुमार कनोडिया आफनो गाडी तोडफोडमा संलग्न राष्ट्रिय जनता पार्टी बाँकेका नेता ललित रौनियारलाई छुटाउन जिल्ला प्रहरी कार्यालय पुग्नु भएको छ ।

आफ्नो पार्टीको प्रचारमा रहेको गाडि बिहान साढे ८ बजेतिर त्रिभुवन चोकमा तोडफोडमा संलग्न रहेको आरोपमा प्रकाउ परेका रौनियारलाई छुटाउन कनौडिया आफै प्रहरी कार्यालय पुग्नु भएको हो । राजपाका कार्यकर्ताहरुले कनौडियाको बा १४ च १३८७ नम्बरको गाडिमा ढुंगामुडा गरी तोडफोड गरेका थिए ।

ढुङगा प्रहार गरेको अभियोगमा राजपा नेता ललित कुमार रौनियारलाई प्रहरीले पक्राउ गरेको थियो । बाँकेका प्रहरी प्रमुख प्रहरी उपरीक्षक टेक प्रसाद राईले कनौडियाले रौनियारलाई छुटाउन सदासयता देखाएको स्वीकार गर्नुभयो । उहाँले भन्नुभयो,‘उहाँले सदासयता देखाउनु भयो तर हामी कानुन विपरित काम गर्न सक्दैनौ ।’

निर्वाचन जस्तो गम्भिर विषयका शान्ति सुरक्षामा ठुलो असर पर्ने भएका कारण कानुन बमोजिम आवश्यक कारवाही उहाँले बताउनुभयो । आन्दोलनका वीचमा राजपाका केन्द्रीय उपाध्यक्ष विजय गुप्ता र सह महामन्त्री पशुपति दयाल मिश्र समेत रौनियारलाई रिहाई गर्न माग गर्दै जिल्ला प्रहरी कार्यालय पुग्नु भएको छ ।

मतदाता भन्दा आन्दोलनकारीको सुरक्षाको चुनौती थपिएको जिल्ला प्रहरी कार्यालय बाँकेका प्रहरी उपरीक्षक राईले बताउनुभयो । उहाँले भन्नुभयो,‘जनता चुनावको पक्षमा छन्, चुनावमा जानु हुदैन भनेर जनता कहाँ जाँदा उनीहरुले चुनाव विरोधीलाई कहाँ बाँकी राख्लान । त्यसकारण चुनाव विरोधीको सुरक्षा चुनौती अहिले बढी छ ।’

ढुङगा मुढा प्रहारबाट गाडिमा सामान्य क्षति भएको बाँकेका प्रहरी प्रमुख प्रहरी उपरीक्षक राईले जानकारी दिनुभयो । ‘गाडी कार्यकर्ता पुर्‍याएर फर्किदै थियो, त्रिभुवन चोकमा रौनियारले रोकेर झण्डा च्याते र त्यही रहेको एउटा ढुङ्गाले गाडिमा हाने, हाम्रा प्रहरीले उनलाई यही समाते ।’

राजपाका केन्द्रीय सदस्य आदेश अग्रवालले बन्दमा गाडि चलाएको कारण तोडफोड भएको बताउनुभयो । उहाँले पक्राउ परेका राजपा नेता रौनियारलाई तत्काल रिहाई गर्न माग गरेका गर्नु भएको छ । राजपाका सहमहामन्त्री पशुपतिदयाल मिश्रले फेसपुक स्टाटस मार्फत पक्राउ परेका रौनियारलाई नछोडिए गाउँमा पस्ने सबै प्रचार गाडिहरु तोडफोड गरिने चेतावनी दिनु भएको छ ।

राजपाको बन्द असर भने नेपालगन्जमा सामान्य रहेको छ । त्रिभुवन चोक र नेपालगन्ज गुलरिया सडक अन्र्तगतको मानपूरमा बन्दको प्रभाव रहेको छ । न्युरोड बन्द गर्न गएका राजपा कार्यकर्तालाई स्थानिय व्यवसायीले लखेटेको प्रहरी उपरीक्षक राईले बताउनुभयो ।