रौतहटको गौरमा बन्दकर्ता र प्रहरीबीच झडप

रौतहट : रौतहटको गौरमा राजपा नेपालका कार्यकर्ता र सुरक्षाकर्मीबीच झडप भएको छ । एकजना प्रहरी घाइते भएका छन् भने तीन जना बन्दकर्ता प्रहरीले पक्राउ गरेको छ ।गौरको सिसुवाचोकमा प्रहरी र बन्द गर्दै हिँडेका राजपाका कार्यकर्ताबीच बुधवार बिहान झडप भएको प्रहरीले जनाएको छ।

झडपमा एकप्रहरी जवान घाइते भएका छन् । उनको नाम प्रहरीले सार्वजनिक गरेको छैन । उनको हात भाँचिएको बताइएको छ । प्रहरीले सोस्थन बाट तीन जना राजपाका जिल्ला स्तरीय नेता पक्राउ गरेको छ । राजपाका कार्यकर्ताले सिसुवाचौकमा प्रहरी चढेको एउटा भारतीय नम्बरको जीप तोडफोड गर्न खोज्दा झडप भएको जिल्ला प्रहरी कार्यालय रौतहटले जनाएको छ ।

पक्राउ पर्नेमा राजपा जिल्ला नेता रामेश्वर यादव, कमलेश सिन्हा र बच्चा यादव रहेका छन् ।राजपा नेपालले गौरमा ना ३ ख ५६२२ नम्बरको बसमा ढुँगामुडा समेत गरेका छन् । राजपाका नेता कार्यकर्ता बिहानैदेखि सदरमुकाम गौरस्थित जिल्ला प्रशासन कार्यालय, अदालत, विपी चोक, भन्सार क्षेत्र, बसपार्क क्षेत्रमा टायर बालेर प्रर्दशन गरिरहेका छन् ।

बन्दका कारण गौरबाट सार्वजनिक तथा निजी सवारी साधन चल्न सकेका छैनन । गौर चन्द्रनिगाहपुर सडकखण्डमा सवारी साधन चलेका छैनन ।
रौतहटको उतरी क्षेत्र चन्द्रपुर नगर क्षेत्रमा र पुर्वपश्चिम राजमार्गमा भने बन्दको प्रभाव देखिएको छैन ।