काठमाडौं : अल्ट्रा धावक सञ्जय पण्डितको पर्वतरोहणका क्रममा अमेरिकामा निधन भएको छ । वाशिंगटनस्थित नेपाली दूतावासका अनुसार उत्तर अमेरिकामा अवस्थित डेनाली हिमाल पर्वतारोहणका क्रममा १७२०० फिटमा पुगेपछि ‘हाइ अल्टिच्युड सिक्नेस’ का कारण पण्डितको शुक्रबार बिहान निधन भएको हो ।
अमेरिकास्थित नेपाली राजदूत अर्जुन कार्कीले पण्डितको हिमाल आरोहणका क्रममा निधन भएको जानकारी दिनुभयो। खराब मौसमका कारण पण्डितको शव बाहिर निकाल्न कठिनाई भइरहेको अमेरिकी सुरक्षा अधिकारीले दूतावासलाई जानकारी गराएका छन् ।
‘खराब मौसमका कारण उनको शव निकाल्न हेलिकोप्टर पठाउन कठिन भएको अमेरिकी अधिकारीले बताएका छन्’, दूतावासका एक अधिकारीले टेलिफोनमा अन्नपूर्णसँग भने ।
पण्डितको निधनबारे दूतावासले काठमाडौस्थित परराष्ट्र मन्त्रालयलाई जानकारी गराएको छ । परराष्ट्रले पण्डितको परिवारजनलाई खबर गरिसकेका छन् ।
प्रतिक्रिया दिनुहोस !
