संवैधानिक परिषद पराजुलीलाई प्रधानन्यायाधीश सिफारिस गर्न असफल

काठमाडौं: कायममुकायम प्रधानन्याायाधीश गोपाल पराजुलीको नाममा प्रमुख प्रतिक्षी दल नेकपा एमालेले असमहमति जनाएपछि संवैधानिक परिषद्को बैठक बिना निष्कर्श टुंगिएको छ ।

सोमबार विहान सिंहदरवारमा बसेको संवैधानिक परिषद्को बैठकमा एमालेका अध्यक्ष एवम प्रतिपक्षी दलका नेता केपी शर्मा ओलीले पराजुलीको नाममा असहमति जनाउनुभएको थियो । बैठकमा प्रधानमन्त्री शेरबहादुर देउवाले पराजुलीलाई प्रधानन्यायाधीश सिफारिस गर्नुपर्ने प्रस्ताव गर्नुभएको थियो । 

उपप्रधानमन्त्री गोपालमान श्रेष्ठले भने परिषद्को बैठकमा प्रधानन्यायाधीश सिफारिसबारे छलफल नै नभएको बताउनुभयो । उहाँका अनुसार प्रधानमन्त्री देउवाले परिषद्को बैठक १० बजे बोलाएपनि प्रतिपक्षी दलका नेता ओली डेढ घण्टा ढिलो पुगेपछि अर्काे पटक बस्ने गरी बैठक स्थगित भएको थियो ।

उहाँले भन्नुभयो,  “प्रधानमन्त्रीले बेलायति राजदूत, सार्क महासचिवलगायतलाई भेटका लागि समय दिईसक्नुभएको थियो । परिषद्को बैठक ढिलो गरी सुरु भएकाले कुनै छलफल नै नगरी स्थगित भयो ।” उहाँले अर्काे बैठकमा प्रधानन्यायाधीशको टुंगो लाग्ने बताउनुभयो । 

एमालेले कायममुकायम प्रधानन्यायाधीश पराजुलीको नाममा असहमति जनाउँदै आएको छ । बैठकमा ओलीले पराजुलीको बिषयमा थप अध्ययन अनुसन्धान गर्नु पर्ने भन्दै सिफारिस गर्न अस्वीकार गर्नु भएको हो । ‘हामीलाई थाहा पनि छैन,केहि सूचना पनि छैन’बैठकमा ओलीले भन्नु भएको थियो। ओलीले असहमति जनाउनु भएपछि अर्को बैठक असार १५ गते बस्ने गरी बैठक टुंगिएको थियो ।