लन्डन : उत्तरी लन्डनमा अवस्थित एक मस्जिदनजिकै सोमबार बिहान आतंककारी आक्रमण भएको छ । एकजना सवारी चालकले आफ्नो भ्यान लगेर पैदलयात्रुमाथि ठोकाएका थिए । पैदलयात्रुहरूका माथिबाट गुडाएको यो घटनालाई बेलायती प्रधानमन्त्री थेरेजा मेले सम्भावित आतंककारी हमला भन्दै टिपपणी गरेकी छन् ।
ती व्यक्तिले पैदल सडक किनाराबाट हिँडिरहेका यात्रुमाथि भ्यान लगेर ठोक्काएका थिए । ठक्करबाट भुइँमा ढलेका व्यक्तिमाथिबाटै उनले भ्यान कुदाएका थिए । त्यस आक्रमणमा परी एक व्यक्तिको मृत्यु हुनुको साथै आठजना घाइते भएका लन्डन प्रहरीले सोमबार जानकारी दिएको छ । यस घटनालाई आतंककारी हमलाको रूपमा हेरिएकोले अधिकारीहरूले अनुसन्धान सुरु गरिसकेको जनाएका छन् । भ्यान चालक ४८ वर्षीय व्यक्तिलाई सडकमा हिँडिरहेका सर्वसाधारणले पक्राउ गरेर प्रहरीलाई बुझाइदिएको जनाएका छन् ।
त्यस घटनास्थलनजिकै एक मस्जिद छ । त्यहाँ मध्यरातदेखि नै प्रार्थना सुरु भएको थियो । प्रार्थनापछि घर जान बाहिर निस्केका व्यक्तिहरूलाई लक्षित गरेर यो आक्रमण भएको एक मुस्लिम नेताले जानकारी दिएका छन् । बेलायतमा यसअघि पनि मुस्लिम लक्षित आक्रमणको प्रयास भएको र यसमा पनि सोही प्रकृतिको हमला भएको ती मुस्लिम नेताको कथन छ । प्रधानमन्त्री मेले यसलाई पनि आतंककारी हमलाकै संज्ञा दिएकी छन् । उनले यसअघि जस्तै यो हमला पनि हिंस्रक रहेको र आतंककारी प्रकृतिको रहेको बताएकी छन् ।
लन्डनका मेयर सादिक खानले यस आक्रमणलाई मुस्लिमका विरुद्धको नियोजित हमलाको संज्ञा दिएका छन् । उनले भनेका छ, ‘लन्डनमा यस्तो प्रकृतिको मुस्लिमविरुद्धको हमला केही समयदेखि हुने गरेको छ । सोमबारको आक्रमण पनि यस्तै प्रकृतिको हो ।' प्रधानमन्त्री मेले यस विषयमा आवश्यक छलफलका लागि भन्दै सोमबारै अबेरतिर मन्त्रिपरिषद्को आकस्मिक बैठक बोलाएकी थिइन् ।
यसअघि लन्डनमा इस्लामिक आतंककारी सम्बद्ध समूहका तर्फबाट जिम्मेवारी लिइएका दुईवटा आक्रमण भएका छन् । सोमबार बिहानको भएको आक्रमणका आठजना घाइतेको तीनवटा छुट्टाछुट्टै अस्पतालमा भर्ना गरिएको प्रहरीद्वारा जारी विज्ञप्तिमा जनाइएको छ । अन्य दुईजना सामान्य घाइतेहरू उपचारपछि घर फर्किएका छन् । यस घटनाको जिम्मेवारी कसैले लिएको छैन । —रासस÷एएफपी
प्रतिक्रिया दिनुहोस !
