मोरङमा ४४ जनाले फिर्ता लिए मनोनयन

विराटनगर : मोरङका सत्रवटा स्थानीय तहका विभिन्न पदमा ४ हजार ४ सय ३१ मनोनयन दर्ता भएका मध्ये मंगलबार ४४ जनाले फिर्ता लिएका छन् ।

क्षेत्रीय निर्वाचन कार्यालय विराटनगरका अनुसार विराटनगर महानगरपालिकामा ९७ पदका लागि परेका ७ सय १४ मनोनयन मध्ये एउटा उमेर नपुगेका कारण रद्द भएको छ भने ११ जनाले आफ्नो मनोनयन फिर्ता लिएका छन । मुख्य निर्वाचन अधिकृत विनोदकुमार पोखरेलले अब विराटनगरमा ७ सय २ जना उम्मेदवार चुनावी मैदानमा रहेको बताउनुभयो । प्रमुख पोखरेलले भन्नुभयो,‘मंगलबार राति अबेरसम्ममा स्वतन्त्र उम्मेदवारालाई चुनाव चिन्ह दिने कामसमेत पूरा भएको छ ।’ पोखरेलले स्वतन्त्रका उम्मेदवार धेरै भएका कारण चुनाव चिन्ह दिन समय लागेको बताउनु भयो ।

क्षेत्रीय निर्वाचन कार्यालयका अनुसार उर्लाबारी नगरपालिमा २ सय ३४ मनोनयन परेकोमा ४, कटहरी गाउँपालिकामा २ सय १५ मध्ये २, लेटाङ नपामा १ सय ७२ मध्ये २, पथरीशनिश्चरे नपामा २ सय ९१ मध्ये एक, कानेपोखरी गापाम १ सय ५५ मा २, सुनवर्षी नपामा २ सय ४६ मा एक,केराबारी गापामा १सय ९३ मा एक, ग्रामथान गापामा २ सय १३ मा ३, जहदा गापामा २ सय २५ मा २, रतुवामाई नपामा २ सय ६९ मा ५, धनपालथान गापामा २ सय १३ मा ५, रंगेली नपामा २ सय ४९ मा शून्य, सुन्दर हरैंचा गाउँपालिकामा ३ सय ५३ मा ३, बुढीगंगा गापामा २ सय ८ मा शून्य, बेलबारीमा २ सय ९५ २ र मिक्लाजुङ गापामा १ सय ८५ मा शून्यले मनोनयन फिर्ता लिएका छन । क्षेत्रीय निर्वाचन कार्यालयका प्रवक्ता भक्ति भट्टराईले मनोनयन फिर्ता गर्ने काम मंगलबार बिहान ११ बजे पूरा भएको जानकारी दिनुभयो ।
क्षेत्रीय निर्वाचन कार्यालयमा तथ्यांक छैन
निर्वाचन आयोगको विराटनगरस्थित क्षेत्रीय निर्वाचन कार्यालयले मनोनयन फिर्ता भई बाँकी रहेका उम्मेदवारको नामावलीको तथ्यांक दुरुस्त नै गर्न सकेको छैन । एक प्रदेशको सबै नामावलीको तथ्यांक दुरुस्त गर्नुपर्नेमा कार्यालयले मंगलबार साँझसम्म मोरङ जिल्लाकै काम पनि पूरा गर्न नसकेको हो । छिमेकी जिल्ला झापा र सुनसरीमा नामावली भने समयमै तयार भएका थिए । कार्यालयका प्रवक्ता भक्ति भट्टराईले इन्टरनेटको समस्या र सर्भर डाउन भएको कारणले सहज रुपमा डाटा उपलब्ध हुन नसकेको बताउनु भयो ।