एउटै कोठामा दुई वडा कार्यालय

गोरखा : खाब्दीभञ्ज्याङको कोल्टेपट्टि एउटा एकतले भवन छ । बुंकोट हेल्थपोस्टले नयाँ भवन बनाएर सरेपछि बचेको थोत्रो, पुरानो उक्त भवनमा सातवटा कार्यालय सञ्चालनमा छन् । सबैभन्दा साँघुरो एउटा कोठामा वडा सचिवको काम हुन्छ । अर्को कोठामा दुईवटा वडाका दुईजना प्राविधिक सहायक, अर्को कोठामा कृषि सेवाकेन्द्र, अर्को कोठामा पुनर्निर्माण प्राधिकरणका प्राविधिक, अर्को कोठामा वडा नागरिक मञ्च र बाँकी रहेको एउटा कोठामा दुईवटा वडाका अध्यक्ष ।

भवनलगायतका पूर्वाधार अभावका कारण सहिद लखन गाउँपालिका ७ र ८ का वडा अध्यक्षले बिगत एक महिनादेखि एउटै कोठाबाट सेवा दिइरहेका छन् । दुवै वडाबाट सेवाग्राही आउँदा भीड हुने, चुस्त सेवा दिन गाह्रो हुने गरेको वडा अध्यक्षको भनाइ छ । दुवै अध्यक्ष एउटै पार्टीबाट निर्वाचित भएकाले भावनात्मक समस्या भने नभएको उहाँहरूको भनाइ छ । कार्यालय सञ्चालन गर्ने पूर्वाधार नहुँदा मतदाताले अपेक्षा गरेअनुसार जोस, जाँगरका साथ काम गर्न समस्या भएको वडा नं. ७ का अध्यक्ष शरण श्रेष्ठ बताउनुहुन्छ ।

‘समस्याको त कुरै नगरौं', वडा नं. ८ का अध्यक्ष काशिनाथ अम्गाईँ भन्नुहुन्छ, ‘मैले वडा सचिव त पाएको छैन, कार्यालयको त अझ परको कुरा ।' दुई वडा अध्यक्ष एउटै कोठामा बसेर कार्यसम्पादन गर्दा एकले अर्कालाई अल्झाउने, डिस्टर्ब गर्ने गरेको उहाँको अनुभव छ । ‘एउटै कोठा छ । कुनैबेला सेवाग्राही धेरै हुन्छन् । कतिपय कुरा गोप्य हुन्छन्', उहाँले भन्नुभयो, ‘भीडभाड हुन्छ । एउटाको सेवाग्राहीले अर्कालाई डिस्टर्ब गर्छन् ।' शान्त वातावरणमा काम गर्न नपाउँदा सकस भएको उहाँको गुनासो छ ।

कामको मेलोमेसो नभएको वडा नं. ७ का अध्यक्ष श्रेष्ठ बताउनुहुन्छ । ‘३७ प्रकारका सिफारिसमा सही गर्नेबाहेक अरू काम गर्न पाएको छैन', उहाँ भन्नुहुन्छ, ‘असार मसान्तको चापाचाप छ । भीड लाग्छ । के नमिल्या के नमिल्या जस्तो भइरहेको छ ।' वडा नं. ७ मा रहेको कार्यालय वडा नं. ८ का लागि धेरै टाढा पर्छ । वडा नं. ८ का लागि सचिव पनि नभएको अध्यक्ष अम्गाईँ बताउनुहुन्छ । दुवै वडाको काम तोयानाथ अम्गाईँले गर्दै आउनुभएको छ।

खाब्दीभञ्ज्याङमा साबिकको बुंकोट गाविसको कार्यालय भवन निर्माणाधीन छ । निर्माण सम्पन्न भएपछि त्यहाँ कुन वडाको कार्यालय सार्ने भन्नेमा अन्योल छ । ‘वडाले निर्णय गर्ने हो कि, गाउँपालिकाले निर्णय गर्ने हो भन्ने पनि अन्योल छ', अम्गाईं भन्नुहुन्छ, ‘अहिले सेवाग्राहीको पहिलो प्रश्न नै वडा कार्यालय कहाँ हुन्छ, भन्ने आउँछ । त्यसको निर्णय मैले गर्ने हो कि कसले भन्ने पनि थाहा छैन ।'