सलाहलाई कीर्तिमानी रकम 

लन्डन : इङ्लिस प्रिमियर लिग क्लब लिभरपुलले इजिप्टका प्रभावशाली खेलाडी मोहमद सलाहका लागि कीर्तिमानी रकम खर्चने भएको छ । सलाहका लागि लिभरपुलले करिब चार करोड ब्रिटिस पाउन्ड खर्चने भएको छ । लिभरपुलले हालसम्म कुनै पनि खेलाडीका लागि खर्च गरेको यो सर्वाधिक रकम हो । लिभरपुलमा आबद्ध हुने प्रक्रियामा रहेका २५ वर्षीय सलाहको छिट्टै स्वास्थ्य परीक्षण गरिने बताइएको छ ।

सलाह हाल इटालियन सिरिए क्लब एएस रोमाबाट व्यावसायिक फुटबल खेल्छन् । उनी सन् २०१५ मा रोमामा आबद्ध भएका थिए । गत वर्ष नै लिभरपुलले सलाहलाई भित्राउने प्रयास गरेको थियो । तर त्यतिबेला पैसाको विषयमा कुरा नमिलेपछि लिभरपुलको योजना अधुरै रहेको थियो । यसपटक पनि लिभरपुलले पहिलो सलाहका लागि दुई करोड ८० लाख पाउन्डको प्रस्ताव अघि सारेको थियो । तर, लिभरपुलको उक्त प्रस्तावलाई रोमाले अस्वीकार गरेको थियो ।

लिभरपुलका खेल निर्देशक माइकल एड्वार्डसले सलाहलाई भित्र्याउने विषयमा रोमासँगको छलफल अन्तिम चरणमा पुगेको जनाएका छन् । यसअघि सन् २०११ मा लिभरपुलले एन्डी क्यारोललाई सर्वाधिक तीन करोड ५० लाख पाउन्डमा क्लबका आबद्ध गरेको थियो । सलाहका लागि खर्चन लागेको वास्तविक रकम हालसम्म नखुलाइए पनि लिभरपुल करिब चार करोड पाउन्ड तिर्न सहमत भएको समाचारमा जनाइएको छ ।

लिभरपुलमा आबद्ध हुनुअघि गरिने स्वास्थ्य परीक्षणका लागि सलाह बुधबार लन्डन पुग्ने बताइएको छ । सलाहले तीन वर्षअघि पनि लिभरपुलले राखेको प्रस्ताव अस्वीकार गरेका थिए । त्यतिबेला उनी एफसी बासेलबाट इङ्लिस क्लब चेल्सीमा आबद्ध भएका थिए । उनले सन् २०१४ देखि सन् २०१६ सम्म चेल्सीबाट व्यावसायिक फुटबल खेलेका थिए । चेल्सीबाट उनी ऋणमा इटालियन क्लब फियोरेन्टिना हुँदै रोमामा पुगेका थिए ।

लिभरपुलको कीर्तिमानी सम्झौता

एन्डी क्यारोल : तीन करोड ५० लाख पाउन्ड
(सन् २०११ को जनवरीमा न्युक्यासल युनाइटेडबाट)
साडियो मेन : तीन करोड ४५ लाख पाउन्ड
(सन् २०१६ को जुनमा साउथह्याम्पटनबाट)
क्रिस्टियन बेनटेक : तीन करोड २५ लाख पाउन्ड
(सन् २०१५ को जुलाईमा एस्टन भिल्लाबाट)
रोबर्टो फर्मिन्हो : दुई करोड ९० लाख पाउन्ड
(सन् २०१५ को जुलाईमा होफेनहिमबाट)
एड्म लालना : दुई करोड ५० लाख पाउन्ड
(सन् २०१४ को जुलाईमा साउथह्याम्पटनबाट)