काठमाडौं : नेपाल धितोपत्र बोर्डले गोप्य सूचना चुहाएको भन्दै एभरेष्ट इन्स्योरेन्स कम्पनीको सेयर कारोबार रोक्का गरेको छ । मंगलबार बोर्डको पत्र पाएपछि नेप्सेले एभरेष्ट इन्स्योरेन्सको सेयर कारोबार रोक्का गरेको हो । धितोपत्र बोर्डको छानबिन नटुगिंदासम्म सेयर कारोबार नखुल्ने नेपाल स्टक एक्सचेञ्जले जानकारी दिएको छ ।
कम्पनीले बोनस, हकप्रद जारी हुनु अर्थात साधारणसभा हुनु अघि संवेदशील सूचना पहिले चुहावट भएको भन्दै बोर्डले अनुसन्धानका लागि कारोबार रोक्का गर्न नेप्सेलाई निर्देशन दिएको थियो र नेप्सेले सोही अनुरुप मंगलबार उक्त कम्पनीको सेयर कारोबार रोक्का गरेको हो ।
६ वर्षपछि साधारण सभा बोलाएको एभरेष्ट इन्स्योरेन्सले २० प्रतिशत बोनस र ६ सय प्रतिशत हकप्रद सेयर प्रस्ताव गरेको छ । उक्त सूचना सार्वजनिक हुनु पहिले नै बजारमा चुहावट भएको हो । गोप्य सूचना चुहाएर सेयरको मूल्य बढाएको प्रारम्भिक अनुसन्धानबाट देखिएपछि बोर्डद्वारा जारी प्रेस विज्ञप्तीमा उल्लेख गरिएको छ । साधारण सभाको प्रस्ताव आउनु पहिले नै एभरेष्ट इन्स्योरेन्सको सेयर मूल्य दुई हजार ६ सय रुपैंयाको हाराहारीमा पुगेको थियो ।
साथै बोर्डले नेशनल हाइड्रो पावर कम्पनीको सेयर कारोबारमा समेत मंगलबार बन्द गरेको छ । कम्पनीको संचालक र कार्यकारी प्रमुखले गरेको निर्णयहरूको आधिकारिता सम्वन्धमा विवाद रहेको र उक्त कम्पनीको पदाधिकारीको आधिकारिकता सम्वन्धमा विवाद रहेको अवस्थामा धितोपत्र कारोवार हुँदा लगानीकर्ताको हकहितमा प्रतिकूल प्रभाव पर्ने हुँदा बार्डले सेयर कारोबार स्थगन गर्न निर्देशन दिइएको छ ।
प्रतिक्रिया दिनुहोस !
