काठमाडौं : उपप्रधान तथा परराष्ट्रमन्त्री कृष्णबहादुर महरासंग नेपाल भ्रमणमा रहेको चिनीया प्रतिनिधि मण्डलले भेट गरी दुई देशबीचको आपसी सम्बन्ध तथा चासोका विषयमा छलफल गरेको छ । पराष्ट्रमन्त्रालयमा बुधवार भएको भेटवार्तामा नेपाल–चीनबीचमा भएका विगतका सम्झौतालाई कार्यान्वयन गरेर अगाडि बढ्ने र आगामी दिनमा आपसी सम्बन्धलाई प्रगाढ बनाउँदै लैजाने विषयमा जोड दिइयो ।
सो अवसरमा परराष्ट्रमन्त्री महराले चीनसँग भएका महत्वपूर्ण सम्झौताहरु पारवाहन तथा यातायात, रोड एन्ड बेल्ट इनिसियटिभस्, क्रस बोडेर इकोनोमिक जोन जस्ता सम्झौतामा दुईपक्षबीच छलफल गरेर कार्यान्वयन गरिने प्रतिबद्ध व्यक्त गर्नुभयो ।
आपसी सहकार्य र समन्वय गरेर अगाडि बढ्ने बताउँदै उहाँले चिनीया उद्योगी व्यावसायीले प्रतिवद्धताअनुसार ८ दशमलव ३ अर्व अमेरिकी डलर बराबरको लगानी चाडै आउने विश्वास व्यक्त गर्नुभयो । मन्त्री महराले स्वतन्त्र व्यापार सम्झौता (एफटिए) सम्बन्धी प्रावधानले नेपालको व्यापार घाटा कम गर्न, उत्पादन वृद्धि गर्न र निर्यात वृद्धि गर्न सहयोग गर्ने विश्वास व्यक्त गर्नुभयो ।
उहाँले नेपाललाई चीनले दिएको ५१२ वटा वस्तुमा दिएको सून्य भन्सार महसुलका कारण पनि व्यापारमा मुलुकले फाइदा लिन सकेको बताउनुभयो । मन्त्री महराले पर्यटन प्रवद्र्धनका लागि दुबै मुलुकबीच पहल गरेर अगाडि बढ्ने उल्लेख गर्नुभयो ।
उहाँले वर्तमान राजनीतिक अवस्थाबारे जानकारी दिँदै संविधानको कार्यान्वयनका शीलशीलामा पहिलो चरणको निर्वाचन शान्तिपूर्ण तवरले सम्पन्न भएको र दोस्रो चरणको निर्वाचन अगाडि बढ्ने क्रममा रहेको बताउनुभयो । मन्त्री महराले सबै निर्वाचन तोकिएको समयमै सम्पन्न हुने विश्वास दिलाउनुभयो ।
नेपाल एक चीनप्रति प्रतिवद्ध रहेको उल्लेख गर्दै उहाँले आपसी, विश्वास समझदारी र पञ्चशीलको आधारमा अगाडि बढ्ने बताउनुभयो । मन्त्री महराले परम्परागतरुपमा हुँदै आएको दुई देशबीको उच्चस्तरीय भ्रमणलाई निरन्तरता दिनुपर्ने बताउनुभयो ।
उहाँले आफ्ना समकक्षी तथा चिनीया विदेशमन्त्री वाङ यीलाई नेपाल भ्रमणको निमन्त्रणा दिनुभयो ।
जवाफमा प्रतिनिधि मण्डलका प्रमुख तथा सहायक विदेशमन्त्री क्वाङ सुयानयु (प्यलन ह्गबलथयग० ले नेपालले ओबोरमा हस्तारक्षर गरेसँगै नेपाल–चीनबीचको सम्बन्ध नयाँ ‘फ्रेम’मा अगाडि बढेको भन्दै आपसी समझदारी, विश्वास र सद्भावका आधारमा सम्बन्ध अगाडि बढेको बताउनुभयो ।
परामर्श संयन्त्रको बैठक फलदायी भएको बताउँदै उहाँले आउँदा दिनमा दुई देशबीच भएका सम्झौता कार्यान्वयनको चुनौति रहेको विचार व्यक्त गर्नुभयो । क्वाङले सम्झौता कायान्वयनमा आफ्ना सरकारी संयन्त्र परिचालन गर्ने प्रतिवद्धता व्यक्त गर्नुभयो ।
उहाँले भन्नुभयो,“ ओबोर बढाउने क्रममा नेपाल एक महत्वपूर्ण मुलुक रहँदै आएको छ । यस कार्यमा नेपाल प्रतिवद्ध भएर अगाडि बढ्छ भन्ने विश्वास छ ।” वाङले यसै वर्ष चीनको उच्चस्तरको भ्रमण गराउने प्रयास भइरहेको जानकारी समेत दिनुभयो ।
उहाँले पराराष्ट्रमन्त्री महरालाई चिनीया विदेशमन्त्री वाङ् यिको बधाई तथा शुभकामना सन्देश सुनाउँदै सक्दो चाडो चिन भ्रमणको निम्ता दिनुभयो ।
बैठकमा पराष्ट्रमन्त्रालयका उच्चअधिकारी तथा नेपालका लागि चिनीया राजदूत यु होङलगायत प्रतिनिधिको सहभागीता थियो ।
मङ्गलबार सम्पन्न संयुक्त परामर्श संयन्त्रको एघारौं बैठकमा भाग दिन चिनीया प्रतिनिधि मण्डल नेपाल आएको थियो । उक्त प्रतिनिधि मण्डलले आजै प्रधानमन्त्री शेरबहादुर देउवासँग छलफल गरी भोलि स्वदेश फर्कने कार्यक्रम रहेको जनाइएको छ ।
प्रतिक्रिया दिनुहोस !
