नयाँदिल्ली : भारतीय क्रिकेट टोलीका प्रमुख प्रशिक्षक अनिल कुम्बलेले आफ्नो पदबाट राजीनामा दिएका छन् । भारतीय टोली सम्हालेको एक वर्षमै कुम्बलेले पदबाट राजीनामा दिएका हुन् । पाँच एकदिवसीय तथा दुई टीट्वेन्टी खेलको शृंखलाका लागि भारतीय टोली वेस्ट इन्डिजतर्फ लागे पनि प्रशिक्षक कुम्बले उक्त टोलीमा सहभागी भएका थिएनन् ।
प्रमुख प्रशिक्षक कुम्बलेले टोलीका कप्तान विराट कोहलीसँगको मतभेद र असमझदारीका कारण मुख्य प्रशिक्षकबाट राजीनामा दिएको भारतीय सञ्चारमाध्यमले जनाएका छन् । कुम्बलेले पनि सामाजिक सञ्जाल ट्विटरमा कप्तान कोहलीसँगको मतभेदलाई आफ्नो राजीनामाको मुख्य कारण उल्लेख गरेका छन् । कुम्बलेले ट्विटरमा आफ्नो प्रशिक्षणमा कप्तान कोहलीको आपत्ति रहेको जानकारी भारतीय क्रिकेट कन्ट्रोल बोर्ड (बीसीसीआई) बाट थाहा पाएको ट्विट गरेका छन् ।
बीसीसीआईले कोहलीसँगको मतभेद हटाउने प्रयास गरे पनि त्यसले तार्किक निष्कर्ष निकाल्न नसकेको कुम्बेले बताएका छन् । कुम्बलेले ट्विटमा आफूलाई प्रशिक्षकमा छनोट गरेकोमा बीसीसीआईप्रति आभार व्यक्त गर्दै आफ्नो प्रशिक्षणको अवधिमा राष्ट्रिय टोलीले पाएको उपलब्धिको श्रेय कप्तान, टोलीका अन्य खेलाडी, कोचिङ तथा स्टाफलाई जाने बताएका छन् ।
प्रमुख प्रशिक्षक कुम्बले र कप्तान कोहलीबीच च्याम्पियन्स ट्रफी सुरु हुनुभन्दा अगाडिदेखि नै मतभेद रहेको समाचार बाहिर आएको थियो । तर, कप्तान कोहलीले भने उक्त समाचारको पटकपटक खण्डन गर्दै आएका थिए । खेलाडीका रूपमा छुट्टै इतिहास बनाएका कुम्बलेले सन् २०१६ जुन २३ मा भारतीय टोली सम्हालेका थिए । भारतीय क्रिकेटमा उनको एक वर्षको कार्यकाललाई सफल मानिन्छ ।
प्रतिक्रिया दिनुहोस !
